Sida lagu sheegay warbixin ay bixiyeen masuuliyiinta caafimaadka
Wasiirka Wasaaradda Waxbarashada, Barbaarinta iyo Sayniska JSL, Prof. Ismaaciil Ducaale Yuusuf, ayaa maanta booqasho ku tegay Cisbitaalka Guud ee Hargeysa, si uu ugu kuurgalo xaaladda arday waxyeelo ka soo gaadhay shil baabuur oo ka dhacay magaalada Hargeysa, gaar ahaan degmada Maxamed Mooge.
Ardaydaasi oo tiradoodu tahay 7, ayaa dhammaantood ahaa arday dhigata waxbarashada aasaasiga ah, gaar ahaan fasallada hoose-dhexe iyo qalin-qabadka (KG). Shilku wuxuu dhacay xilli ay ardaydu kasoo baxeen dugsi ay wax ka baranayeen, waxaana si degdeg ah loogu qaaday Cisbitaalka Guud si loola tacaalo xaaladooda caafimaad.
Sida lagu sheegay warbixin ay bixiyeen masuuliyiinta caafimaadka ee cisbitaalka, 3 ka mid ah ardayda ayaa soo gaadhay dhaawacyo culus oo ay ku jiraan jabniin lafaha ah, halka 4-ta kale xaaladoodu fiicnayd lagana saaray cisbitaalka kadib markii loo fidiyey adeegyo caafimaad oo degdeg ah.
Wasiirka ayaa warbixin rasmi ah ka dhageystay masuuliyiinta caafimaadka ee goobta, isaga oo sidoo kale la kulmay waalidiinta ardayda dhaawacantay. Waxa uu bogaadiyey dadaalka degdegga ah ee ay sameeyeen dhakhaatiirta iyo maamulka cisbitaalka, isaga oo xusay in tallaabooyinka noocaas ah ay yihiin kuwo lagu kasbado kalsoonida bulshada.
Sidoo kale, Guddoomiyaha Waxbarashada ee Gobolka Maroodi-jeex, Mudane Maxamed Xuseen Muuse, oo booqashada ku wehelinayay Wasiirka, ayaa sheegay in xafiiskiisu si degdeg ah uga falceliyay dhacdadaasi, isaga oo xusay inay si dhaw ula socdaan xaaladda ardayda dhaawacantay iyo talaabooyinka la qaaday.
Ugu dambeyn, Wasiirku waxa uu muujiyay dareen walaac ah oo ku saabsan badbaadada ardayda ee gaadiidka dugsiyada, isagoo sheegay in loo baahan yahay in la xoojiyo talaabooyinka lagu ilaalinayo ardayda, gaar ahaan xilliyada ay dugsiyada ka baxayaan. Waxa uu ugu baaqay waalidiinta, maamulayaasha dugsiyada, iyo hay’adaha amniga in ay si wadajir ah uga shaqeeyaan sidii loo xaqiijin lahaa badbaadada ardayda.
Wasiirku waxa uu Alle uga baryay inuu u boogo-dhayo ardayda waxyeeladu ka soo gaadhay shilkaasi, isaga oo u rajeeyay caafimaad degdeg ah iyo in ay si nabad ah ugu soo laabtaan waxbarashadooda.
hadhwanaagnews 
