Ceel-Afwayn oo Laga Bilaabay Qaramaynta Ciidanka Madaniga ah

Friday April 04, 2025 - 10:45:07
hadhwanaagnews
Wasiir ku xigeenka ayaa intaasi ku daray in ilaa ay ka qaramaynayaan



Dufcadii koowaad ee qaramaynta ciidamada madaniga ah ee degmada Ceel-afweyn ayaa la wareejiyey, madasha lagu qaramaynayey ciidanka madaniga ah ayaa waxa goob joog ahaa wasiirrada wasaaradaha Gaashaandhiga, gaadiidka iyo jidadka, Wasiir ku xigeenka Wasaaradda Maalgashiga, Dib u dajinta iyo sidoo kale Taliyha Ciidanka qaranka Jamhuuriyadda Somaliland.

 

Ugu horrayn waxa madasha lagu qaramaynayey dufcada koobaad ee ciidanka Madaniga ah ee degaanka Ceel-afwayn ayaa waxa ka hadlay Wasiir ku xigeenka Wasaaradda Maalgashiga Maxamed Cilmi Huuno waxana uu sheegay in ciidankii ugu horeyey ee ka mid ah ciidamada madaniga ah ee ku sugnaa Ceel-afwayn la qarameeyey, hadda wixii ka dambeeyana ay noqonayaan ciidan ka mid ah ciidamada Qaranka Somaliland.

 

Wasiir ku xigeenka ayaa intaasi ku daray in ilaa ay ka qaramaynayaan gaadhiga u dambeeya aanay ka tagay degmada ceel-afwayn waxaanu yidhi "Ilaa Gaadhiga ama ciidanka Madaniga ah ee ugu dambeeya aanu meesha ka qaadno ka tagi-mayno ee horta taa ogaada, hawsha iyo tacabka uun baa na lays dheeraanayaaye qof waliba wixii uu qabtay waa la qori doonaa”.

 

Geesta kale Maxamed Cilmi Huuno Wasiir ku xigeenka wasaaradda Maalgashiga ayaa mar uu ka hadlayey nabadaynta Ceel-afwayn ayaa waxa uu yidhi "Nabadayntu meel wanaagsan ayey maraysaa, dhawaana waxaan filaynaa in ay soo gabagabowdo, go’aamo wanaagsan oo ina wada qanciyaana ay ka soo baxaan, inta ay nabadaynu socotana waan idiin joognaa, qorshayaasha fulinta iyo dhamaystirka ba waanu joogaynaa”.

 

Wasiir ku xigeenka Waasaradda Maalgashiga ayaa hoosta ka xariiqay in aanay deegaanka Ceel-afwayn ka dhici doonin qaadashada qori aan sharci ahayn isla markaana ay sidato cid ka baxsan Ciidamada qalabka sida ee qaadasha hubka kala duwan sharcigu u ogol yahay.

 

Gabagabadii waxa iyaguna hadalo koob kooban ka jeediyey madasha Ciidamada Madaniga lagu Qaramaynaayey Masuuliyintii kale ee ka soo qayb galay waxaana ay sheegeen isla markaana hoosta ka xariiqeen in la soo gaadhay wakhtigii ciidanka madanigu ay ka mid noqon lahaayeen ciidanka qaranka, taasina ay ku timid balaqaadkii madaxwaynaha Jamhuurioyadda Somaliland Cabdiraxmaan Maxamed Cabdilaahi Ciro uu hore ugu dhawaaqay.

     
Loading...