Hadhwanaagtv Wajaale, - (HWN)- Xoghayaha Ganacsiga iyo Warshadaha ee Xisbiga Mucaaridka ah ee WADDANI Mudane Xamse Cabdiraxmaan Khayre ayaa barta uu ku leeyahay mareegta xidhiidhka Bulshada ee Facebook waxa uu ku sheegay dhibaatada caafimaad eek a taagan magaalooyinka Wajaale iyo Kala-baydh isaga oo soo qaatay hadal uu degmada Kala-baydh hore uga jeediyey oo ku saabsan xaaladda liidata ee adeegga caafimaad ee Magaalada Kala-baydh oo uu ku yaallo mid ka mid ah kastamada ugu waaweyn dalka. Halka uu sidoo kale xoghayuhu soo qaatay warbixin telefishanka MM Tv ka diyaariyay dhibaato ka taagan cisbitaalka Wajaale.
Xoghayaha Ganacsiga iyo Warshadaha ee Xisbiga Mucaaridka ah ee WADDANI Mudane Xamse Cabdiraxmaan Khayre mar uu ka hadlayay xaaladda liidata adeegga caafimaad ee Kalabaydh waxa uu sheegay in Magaaladaasi Kalabaydh uu ku yaallo Kastam xukuumadda u soo xereeya sannadkii lacag dhan 40-Milyan oo Dollar haddana Cisbitaalka yar ee ku yaallaa koronto la’aan haweenka lagaga umuliyo toosh taasi oo uu ku tilmaamay wax aan la aqbali Karin, shacabkana Gobolka Gabilayna ku ah liidnimo sida uu Xoghayuhu hadalka u dhigay.
Xoghayaha Ganacsiga iyo Warshadaha ee Xisbiga Mucaaridka ah ee WADDANI
Mudane Xamse Cabdiraxmaan Khayre oo arrintaasi ka hadlayaa waxa uu yidhi:
"Halkan aynu joognaa waa Kalabaydh. Halkaa waxaa iiga muuqda Kastamkii. Waa
Kastamkii labaad ee ugu weynaa Somaliland. Sannadkii waxaa ka soo xerooda
40-Milyan oo Dollar oo ay Somaliland ka heshaa. Gobolkaa Gabilay waxa kaga soo
noqda Afar ama Saddex Milyan iyo Badh. Kaasi halkaa isna ka muuqdaa waa
Dhakhtarkii iftiin la’aantiisa Tooshka lagaga umulinayay Hooyooyinka. Wax aan
Kiiloo mitir ahayn ayay isku jiraan. Waa dadnimo xumo iyo liidnimo Reer
Gabilayow in xoolaha umadda ee Intaa le’eg ee deegaankiina ka soo baxaya in
haddana haweenkiinii Toosh lagaga umulinayo. Kuwa Madaxda ah ee Gobolka ka soo
jeeda in ay maanta is casilaan bay ahayd.
"Madaxweynuhu halkan ayuu joogay wiiggii hore. Wasaaradda Caafimaadka
ninka Agaasimaha ka ahi waa reer Gabiley, maxaydin u malayn Bulshooyinkii kale
ee ka fogaa ee xaggaa iyo xuduudaha ku teedsanaa, dhaqaalaha aan lahayn,
iyagana maxaydin u malayn?, Aqbali mayno 40-kaa Milyan in ay haddana haweenka
deegaanku ku dhalaan Toosh lagaga umuliyo”. Ayuu yidhi
Dhinaca kale Xoghayaha Ganacsiga iyo Warshadaha ee Xisbiga Mucaaridka ah
ee WADDANI Mudane Xamse Cabdiraxmaan Khayre waxa uu Bartiisa ku baahiyey
Warbixin uu Telefishanka MM-TV ka diyaariyay xarunta caafimaad ee Degmada
Wajaale, taasi oo muujisay xaalad argagax leh oo ka taagan Cisbitaalkii Degmada
Wajaale kaasi oo ku sugan xaalad uu Telefishanku ku sheegay mid aad u liidata
iyada oo warbixintani muujinayso mushahar la’aan ay ka cabanayaan shaqaalaha
caafimaadka ee Cisbitaalku, Qalabka duugga ah ee ku daranyooday cisbitaalka,
adeeg la’aantiisa, fayo-dhawrkiisa oo liita iyo in uu isku baddalay goob laga
guuray oo shimbiruha iyo xayawaannadu u hoydaan.
"Degmadda Gabiley oo ah ta saddexaad ee ugu dakhli badan dalka waa ta keliya ee 23-ka degmo doorasho ee dalka aanay Miisaaniyaddeedii 2022 ansixin Goleyaashii la doortay ee Wakiiladda & Deegaanka Gabiley ee xaqa u lahaa” ayuu yidhi Xoghayaha Ganacsiga iyo Warshadaha ee Xisbiga Mucaaridka ah ee WADDANI Mudane Xamse Cabdiraxmaan Khayre.
