Maansadan waxa tiriyey cabdirisaaq axmed cigaal (darwiish) waxaanay si dhab ah u soo banbixi naysaa dhibka iyo daranyada qofka qabsata maantuu bilaamo inu naftiisa ku hogaamiyo meeshaa mahlakada badan ee marar badan nafta lagu waayo.

    Adigoon tahriib gelin

    Ama tubaha dhaadheer

    Nafta aan ku tuurin

    Talyaani adoon tegin

    Ama turki ka sheekayn

    Tabaalaha aduunyada

    Tabcashada dalkaagaa

    Horta lagu taabaayoo

    Beryo laysku taagaa.

    Tahriibtu waa biime

    Tamootidu dhinac taal

    Marinkeedu waa tacab

    Tamashlayn ka dheertahay

    Tacadina u dheer yahay

    Ku tumashada dadweynaha

    Dhimashadoodu garabtaal

    Taarkeedu waa ciil

    Tiiraanyo weheliso

    Hableheena tiriigiyo

    Taajir iyo ayaanba leh

    Hadba tooda goosha ah

    Ajanabigaa turuqa weyni

    Miyey Dharag uga tageen

    Intaas oo wada tilmaamo ah

    Oo wada tiiraanyo ah

    Iyo qaar kaloo kasii togan

    Oo ay tarjumaanadeediyo

    Ragii soo tabiyey joogaan

    Tahriibaa u aabee

    Dhalinyarooy u toog hay.

    Dhulkeenan tacabka leh

    Ee wada tilmaaman

    Xab-xabkiyo tamaandhada

    Timirtiyo babaygiyo

    Tufaaxiyo beeyada

    Hadhuudhkii tolmoonaa

    Waxa canab tisqaadee

    afgooye u gaar tahay

    togdheer goonyaheediyo

    toomaha aroori iyo

    ama sabadii tiyigloow

    jamaame tuurihiisiyo

    togogaa wajaalee

    tartarada jabshee

    soo tuuray badarkee

    waa toban kun oo mayl

    dhulka lagu tanaadee

    gaajadiyo tamootida

    ama tabaalaha aduunyada

    aan laysku tebin weligeed

    dad waxbuu is tusaaye

    naftaad biime ku tuurtay

    hadaad toobiyaha qaado

    oo talyaani isku tuurto

    tacabkaagu waa adoonimo

    xoriyaadu waa tuuris

    dhaqankaagii soo taxnaa

    tifta horeba waa saydhi

    kooda wada tafantoofka ah

    judha hore isku taag weeye

    shisheeyaad ku tolantoo

    taws baad ku maqan tahay

    abaal kuuma tabcaane

    tooday kugu fulinayaan

    tuugyo aam damahayn

    waligaa la taagnow weeye

    cibaadadiyo tawxiidka

    tacabkiyo waxqabadka

    tastuurkii islaamkaba

    ha ku tiraabin weeye

    meel khamriga lagu taftirey

    laysu tabiyo xashiishada

    diintaada tuur weeye

    islaamkana ka tag weeye

    intaas oo wada tilmaamo ah

    iyo qaar kaloo kasii togan

    oo ay tarjumaanadeediyo

    ragii soo tebiyey joogaan

    tahriibaa u aabee

    dhalinyarooy u toog hay.

Waxa Qorey: Cabdirisaaq Axmed Cigaal (Darwiish)

[email protected]