Gaadhiga Ugu Caansan Somalilaan
Intii aanan qaangaadhin ee aan ku noolaa caasimadda gobolka waqooyi bari oo iminka la yidhaahdo Togdheer ee Burco, waxaan magaaladda
ku arki jirey Gaadhi Huruud ah oo noociisu ahaa Nissan, UD.
Gaadhigaasi wuu ka duwanaa Gaadiidka noociisa ah ( special
addition), halka ay gaadiidka noociisa ahi u ekaayeen halo duqoobey,
isagu wuxuu u ekaa Baarqab ka dheer oo ka qurux badan kuwa kale.
Gaadhigani wuxuu ahaan jirey xidigga gaadiidka togdheer, wuxuu
wakhtigii nabadda soo daabuli jirey saabuunta Taydha la odhan jirey oo
wershaddeedu Muqdisho ku taaley, mulkiilaha gaadhiguna shirko kula ahaa
wershadda ganacsade kale, wuxuu kaloo leeyahay taariikh cuddoon oo uu la
wadaago intii u soo ol'olaysay halgankii Xoraynta ee la iskaga
kicinayey dulmigii keligii taliyihii xukuumaddii kacaanka.
Wuxuu habeen iyo maalin guri jirey ciidamadii xaq u dirirka
ahaa, markay dagaal ku socdaan iyo haddii gurmad loo baahdo, waxaa
saarnaan jirey hub waaweyn iyo kuwo fudud hadiiba cadow soo weeraro,
wuxuu qaadi jirey saadka ciidanka. Ma jirin cid dayactir iyo shiidaal
toona la qaybsan jirtey mulkiilaha gaadhiga, Illaahay janadiisa ha ka
waraabiyo Cabdi Cawed ( Indha deero ). Anigoo ka mid ahaa ardaydii
goobjooga ahayd duhurkii la laynayey, Indho deero tiisa ayaan gelin
wakhtigaa la tooganayey 43kii ganacsade iyo haldoor ee reer Burco,
wuxuuse ku jirey liiska dilka ku xukunnaa. Illahay isaga iyo intii
dadkooda nafta iyo maalka u hurtayba waxaynu u weydiinaynaa janada lagu
waarayo, Aamiin.
Bashiir Tarabbi Oogle,
Somalilaan.
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...