Cawo-Daran Ciil Kama Koraa Qaba ( Abdi-Shotaly).
Waxa meesha ka jiraa waa Cawo-Daran (Somaliland weeyee) oo ciil kama kore-yaal u gacan gashay, aan micno iyo tallo midna aan u garanayn. Kuwii hore looga inaab-saday ( waa Raggii ma adigaa ka hadhay iyo geenyo shaaximane), oo aan weligood goob ay lib ka keeneen hore iyo dib mid-na aan loo arag saw may kufsan, oo siddii doqonkii may odhan " Caashaay Macaanaa". Waxa xidhi-xidhan Abwaanaddii oo uu ka mid yahay Abwaan Baashe, Weriya-yayaashii sidda Cabdimaalik Muse Codoon, waxa dalka ka baxsaday markii xadhig loo diyaariyey Shaqaalihii Hadhwanaag, oo kala ah " Tafa-tirihii, A/Rahman sheekh, iyo Good oo qaadi jirey wereysi-yadda. waxa jeelka ka buuxa macali-miintii sidda Cbadilqaadir Nuur, hooyooyin buraan-burey baa iyana xabsiga loo taxaabay, Ciidankii ilaalin jirey Gudoomiyaha Xusbiga Waddani Mudane Cabdirahman Cirro, baa 24 maalmood bilaa sharci laguhaystaa, Kuwii isku sheegi jirey waxa nala yidhaahaa madasha, oo awel-ba markay askartu waxay doonayaan walaaqayeen aan juuq ka odhan jirin, isku qarin jirey dhex-dhexaad baanu nahay, oo hadeer bood-boodaaya baan iyana aragnaa. Wakiilo ku sheega iyo golaha noqday meel la iska dhaxlo, siddii ay xoola aabahood ka tegay ( Waa guurti ku sheega'e), baa iyana sharci darro laba sano iyo saddex sano isugu dhuftay. maxakamadi ma jirto oo amarka askariga bay wax ku xukuntaa, siduu yidhaahana waxay go'aamisaa, distoor iyo sharci dabadda baa laga tuuray, haba yaraatee wax meesha yaalaa ma jiraan, ee waa qaataye qaado.
Waxa intaa ka sii xun oo aan ku soo xidhay maqaalkan, Hore baa loo yidhi " Nin ambaday halkuu maray way ula ekoonayde" Waa kaas qarda-jeexay askariggii jaahilka ahaa, ee hadda meel uu cuskado la', kolkuu qaato makara-foonkaba wax aan loo fadhiyin ka dhataq siinaaya, siddii lo' xaaluf daaq ahayd oo dood ka dheregtay. wuxu yidhi Ismaaciil Mire " Ragaw kibirka waa lagu kufaa kaa ha la ogaado" , Qaasima wuxu yidhi " Nin kastoo kash-bacay kelyuhu, way ka soo dhadhiye". Waxan uga socdaa tani sidan ku sii socon mayso, oo afartii taayir-ba dhulkay fadhiyaan, mishiinkii wuu isku dhalaalay, shicibkii saarnaa way la saydhiyey, siddii qaalin layli ah oo rarkii qubay, intuu cidla kula buubay, bay afartii baabaco dhulka ka qaaday, karin bay ka dhuushay, oo way dhaawac beeshay, waxa weliba inta au sii dheer, iyadda oo aan haysanin cid aasta oo calaa-qala iilka dhigta, ee hanba-deedda baa haadku gigayaa, xataa aanu harag-na ka soo hadhayn, qaarna ay meyd-keedda ugu sacab garaaca-yaan, oo ay dhogortii qudhuntay ee haadku ka xishaaday, ay ilaa hadda urursa-nayaan iyaka oo sidaas ku sheegaaya waa maamul saxa ah. Waxan ugu dambayn akhristaw kaga baxay, wax meesha yaalaa ma jiraan, waxa ummadda ka sii nool oo keliya lafahii ay feenteen cayayaanku, sidda qudhun daaqa door-yaanka, duqsiga iyo bahalaha hoose intii aya ku hirdami jireen, sidaas awgeed kani gelbey, soona noqoqn mayso, ee tani idin dhaaftaye maraqa caba.
* N.B Nin Kastoo Kash-baca Kel-yuhu, Way Ka Soo dhadhiye"
Qore:- Abdi-Shotaly.
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!