Nairobi(HWN):-Duqa magaalada Nairobi Mike Mbuvi Sonko ayaa xabsiga loo taxaabay ka dib markii uu dacwad oogaha guud ee Kenya soo saaray warqad amar ah oo uu ku dalbaday in la soo xidho.

Booliska magaalada Nairobi ayaa maayarka ka soo qabtay magaalada VOI oo uu booqsho ku joogay.

Nuuradiin Xaaji oo ah Dacwad oogaha guud ayaa sheegay in maayarka magaalada Nairobi Mr Sonko la waydiin doono su,aalo ku saabsan halka ay ku maqan tahay lacag badan oo qeyb ka ahayd dhaqaalihii loogu talagalay ismaamulka Nairobi, isagoo intaas ku daray in xafiiskiisa uu hayo caddeymo ku filan.

Dacwad ooge Nuuradiin Xaaji ayaa dhanka kale booliska amar ku siiyay inay ka hor tagaan wax walba oo caqabad ku noqon kara baadhitaanka la xidhiidha lacagta loo haysto maayarka Nairobi.

Maayar Sonko ayaa su’aalo laga weydiin doonaa lunsashada lacag gaareysa Sh 357 million, oo ka mid ah dhaqaalaha ismaamulka, lacagtaasoo la waayey meel ay ka baxday mudadii uu xilka hayey Sonko.