Qaramada Midoobay ayaa kufsi horaantii Isbuucan gabar 11 jir ah loogu geystay magaalada Muqdisho ku qeexday "fal argagax leh".

Bayaan uu soo saaray madaxa UNFPA, xafiiskeeda Soomaaliya, Anders Thomsen ayaa lagu cambaareeyay dhacdadaas.

Bayaanka ay hay'addu soo saartay oo lagu daabacay bogga ay internet-ka ku leedahay ayaa lagu yiri sidan: "Sanduuqa Qaramada Midoobay ee Dadweynaha (UNFPA), xafiiskiisa Soomaaliya wuxuu cambaraynayaa ficilkii foosha xumaa ee loo gaystay gabadh 11 sano jir ah, oo lagu kufsaday Talaadadii toddobaadkan iyadoo markaas gurigeeda ku soo laabaneyso oo ku yaal Degmada Wardhiigleey ee Magaaladda Muqdisho, Soomaaliya.

Waa naxdin iyo argagax weyn in ay sii socoto inaan aragno falalka noocan oo kale ah oo si isdaba joog ah u dhacaya. Waxaan garab taaganahay qoyska gabadha, waxaana ku baaqaynaa in caddaalad la horkeeno dhacdadan kaliya maahee, laakiin kiisas badan oo tacadiyaadka galmada la halmaala kuwaas oo sii socodkoodu khatar galinayo wanaagga, iyo badbaadada gabdhaha iyo haweenka Soomaaliya.

Xadgudubyada loo geysto haweenka iyo gabdhaha waa ku xadgudubka xuquuqul insaanka. Waa wax laga xumaado in la arko falalka noocaas ah dhacaya inta lagu guda jiro 16-ka Maalmood ee ololaha looga soo horjeedda tacadiyada ku salaysan jinsiga.

Waxaan dhamaanteen u baahanahay inaan ka wada shaqeyno sidii aan u hubin laheyn jiritaanka tallaabooyin ilaalinkara oo ku habboon gabdhaha iyo Haweenka Soomaaliyeed, waxaanan ku baaqeynaa in si dhakhso loo dardargaliyo ansixinta xeerka Dambiyada Galmada la xariira oo iminka horyaalla baarlamaanka dalka Soomaaliya".

Ma aha markii ugu horreysay ee meelo Soomaaliya ka mid ah laga soo tabiyo kufsi loo geystay gabdho da' yar.

Bishii May ee sanadkan Maxkamadda darajada 1-aad ee Gobolka Nugaal ayaa xukun dil ah ku ridday raggii ku eedaysnaa kiiskii Caasho Ilyaas Aadan oo sanadkaan horraantiisii kufsi iyo dil loogu geeystay magaalada Gaalkacyo.

Guddoomiyaha maxkamadda Sheekh Cabdinuur ayaa ku dhawaaqay xukunka.

Ragga la xukumay ayaa kala ahaa: Cabdifataax Cabdiraxmaan Warsame, Cabdisalaan Cabdiraxman Warsame iyo Cabdishakuur Maxamed Dige, waxaana lagu xukumay dil toogasho ah oo ay fulinayso dowladda Punland.

'Waxaan ka cabsaneynaa raggii la rabay inay na difaacaan.