Anigoo ku hadlaaya magaca Maamulka Sare ee Baanka Dhexe, iyo kan shaqaale weynha Baanka Somaliland, waxaan Tacsi u dirayaa qaranka Somaliland shacbi iyo dawladda gaar ahaan ciidanka boliska, geerida naxdinta badan ee ku timid marxuum Taliyihii Boliska, Sareeye Gaas Cabdilaahi Fadal IImaan oo caawa ku geeriyooday Hargeysa. Waxaan tacsida iyo tiiraanyada la wadaagayaa reer Iimaan, qoyska marxuumka, walaal iyo waalid iyo tafiirta reer iimaan.

Marxuum S/G Cabdilaahi waxaa lagu xusuusan doonaa hawlkarnimo, daacadnimo, dal jaceyl iyo u darbanaan horumarinta ciidanka boliska, Waxuu ahaa madaale aan aqoon daal, nasasho iyo shaqo yareysi. Waxuu ahaa dhegta, isha, gacanta iyo lugta qaranka ee sugta ammaanka dalka. Waxuu ahaa nin darajadu ayna bedelin, ee u yaqaanay inay tahay culays iyo fariin u tilmaamaysa adeega bulshada. Waxuu ahaa nin askar, sarkaal iyo shacbiba si aan isla weyni lahayn ula dhaqma, nin agtiisa shaqo tahay shaqo oon midna ka xaragoon.

Waxaan Alle uga baryayaa inuu u naxariisto, dambigiisa dhaafo, qabriga u nuuro una waasiciyo, ugana dhigo beer ka mid ah kuwa fardawsta sare. Sidoo kale waxaan Alle uga baryayaa inuu qoys, ehel, asxaab, ciidanka boliska iyo qaranka Somaliland waafajiyo samir iyo duco. Aamiin.