Qalin-Jebintu Ma Aha Aqoon-Dhammaad
Ugu horrayn, fahanka guud ee ku aaddan maxay tahay jaamacad-dhigasho sida
ay u arkaan arday badan oo jaamacahaha dhigtaa sax ma aha. In
jaamacad ama xarun aqooneed la dhigto oo muddo dheer lagu jiro
macneheedu ma aha ka dib marka la dhammaysto in wax la yidhaa buug iyo
akhris aan dib loo eegin. Waa gefka ugu weyn ee ay ku dhacaan arday
badani qalin-jebinta ka dib, taasi oo ka dhigan aqoontii ay soo wadeen
ee intaas oo simister ku foognaayeen mar qudha in ay faraha ka qaadaan.
Buug-xoornimadaasi waqti kooban gudihii waxa ka dhasha in uu qofkii is
masaxo oo wixii uu soo bartay baabah iyo faro madhan ka soo istaago.
Guud ahaan inta uu qofku waxdhigashada ku gudo jiro sawirka uu ka
haysto maaddada uu baranayo waa mid aan aad u muuqan, taas na wax u
sabab ah xaaladda ardaynimmo oo is ka wata culayskeeda, sida waajibaadka
ardayga la ga rabo iyo imtixaanaadka aadka u tirada badan ee uu maro
sannadaha jaamacadeed. Muuqaalka uu leeyahay takhasus waliba wax uu
yimaaddaa dhammaysashada jaamacadda ka dib, gaar ahaan kulliyadaha aan
ahayn practical-ka sida caafimaadka iyo IT-ga. Se muuqaalkaasi waxa hela
oo qudha qof aan saydhin wixii uu bartay oo aan noqon kutub-xoor
waxakhriskiisiina sii watay.
Haddaba si takhasuskii aad baratay fahankiisu u ballaadho oo guud
ahaan aqoontaadu u noqoto mid macne kuu samaysa haddaynnin akhriskii aad
wadday intii aad jaamacadda ku jirtay. Aad u gudo gal wixii aad soo
baratay oo wax badan ka akhri. Waxbaadhis samee oo meelo badan wax ka
akhri. Maanta si fudud baad u heli karta wixii macluumaad amma buug ah
ee aad u baahato. Internetka ka soo dejiso oo moobilkaaga ama
computerkaaga ku shubo. Marka aad fakaag u heshoba akhri goob kasta iyo
goor kasta oo aad joogto. Haddii akhriskaagu yaraa, waa suure horraaanta
in aad culays amma caajis dareentid kaas oo kaa hor istaagi sii wadidda
akhriska, se in muddo ah marka aad joogtayso aakhirka waad la qabsan oo
wax aad is arki adiga oo saacado badan wada oo aan ka xiiso dhacayn,
ilaa aad ka gaadho xaalad aad u soo hamuumto waxakhriska oo aad u soo
boholyawdid. Marka dambe heer baad u gudbi ammin kasta oo aad diiqad iyo
walaac dareento uu akhrisku kuu noqdo isha aad farxadda iyo raynraynta
ka hesho ee aad ku nafisto. Akhriskaagu ha noqdo mid xor ah oo aad iskaa
u waddo. Ha ka geddisnaado kii aad u akhrisan jirtay imtixaanaadkii iyo
laylisyadii jaamacadda ee aad ku dirqanayd. Noloshaada yawmiga ah
wax-akhisashadu ha ka mid noqoto. Waa laga qurux badan yahay
jaamici/jaamiciyad aan wax ba akhrisan. Si aad u dareento qofnimadaada
oo u ogaato qiimaha aad leedahay akhris u kaasho. Ilaha kala duwan ee
aqoonta laga daalacan karo aad bay u tiro badan sida degallo wax lagu
qoro, cilmi baadhisyo la sameeyay oo internetka lagu baahiyay amma
warbaahinta kala geddisan laga sii daayay, inta ba isku day in aad ka
faa’idaysato oo aad moogganaan. Sida aanad cuntada iyo cabbista uga
maarmi karin marka uu akhriskaagu noqdo, midhihiisa is dhakhso ah baad u
guran, waxana ugu horreeya oo aad ka dheefi doonta in aad noqoto qof
soo jeeda oo aan moogganayn waxa hareerihiisa iyo adduunka kale ba ka
dhacaya. Farxad iyo sacaado joogto ah baad dareemi doontaa. Haddii aad
bilaa shaqo tahay si fudud ayaad u heli waayo qof dariiqii arsaaqadda
haya ayaa tahay, sababta oo ah waxa aad la socotaa fursadaha shaqo ee
kolba soo baxaya, wax aad taqaannaa oo raadinaysa jaanis walba oo shaqo
lagu helo. Waa taas jaamicinnimadu.
Muxiyadiin Axmed Xasan
Kuwait.
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...