Boorama(HWN):-Dablay hubaysan ayaa weerar ku qaaday saldhiga dhexe ee boolisku ku leeyihiin magaalada Boorama ee xarunta gobolka Awdal.

Weerarkan oo dablaydu ay gaysatay waabarigii Saaka oo ahaa mid gaadmo ah ayaan ilaa hada la garanayn cida ka dambaysay iyo sababta keenty in la weeraro saldhiga booliska ee magaalada Boorama.

Dablaydan weerarka soo qaaday ayaa difaac adag kala kulantay ciidanka booliska ee ku sugnaa saldhiga dhexe ee Boorama, taas oo keentay in weerarka ka dib ay dablaydu ka baxdo magaalada.

Wararka ka imanaya magaalada Boorama ee xarunta gobolka Awdal ayaa sheegaya inaanu jirin wax khasaare dhimasho ah oo ka dhashay weerarkaasi.

Xukuumada somaliland ayaan ilaa hada ka hadal weerarkan iyo cida ka dambaysay, balse wararka laga helayo magaalada Boorama ayaa sheegay inay jirto jabhad ka dagaalanta deegaanada gbolka Awdal.