Hargeysa(HWN):-Xukuumada somaliland ayaa xabsiga dhigtay agaasimihii guud ee wasaarada warfaafinta iyo agaasimihii waaxda maamulka iyo lacagta ee wasaaradaasi.

Xadhiga labadan masuul ee ka tirsan wasaarada warfaafinta ayaa yimid ka dib markii lagu soo eedeeyey inay falal musuq maasuq ku kaceen.

Ka dib markii labadan masuul loo xidhay falalka musuq maasuq ee lagu eedeeyey ayaa Xukuumada madaxweyne Muuse Biixi waxay 24 saacadood ka dib xoriyadiisii u celisay agaasimihii guud ee wasaarada warfaafinta Cismaan Xuseen.

Wararka ayaa sheegaya in sii daynta agaasime Cismaan Xuseen ay keentay ka dib markii ay xukuumadu cadaadis kala kulantay deegaanka uu ka soo jeedo ee bariga Burco, iyada oo lagu andacoonayo in xaaladiisa caafimaad aanay u saamaxayn inuu sii xidhnaado.

Cismaan Xuseen ayaa markii uu helay xoriyadiisa waxa la arkay isaga oo ku tashlaynaya mid ka mid ah hudheelada waa weyn ee magaalada Hargeysa.

Qaabka xoriyadiisa loogu celiyey agaasimihii iscasilay ee wasaarada warfaafinta Cismaan Xuseen ayaa su,aalo badan dhalisay iyada oo dadka qaarkood ay ku doodayaan in marka hore-ba la saadaalinayey inaan mudo badan la sii hayn maadaama oo uu ka soo jeedo deegaankii xulafada siyaasadeed ama gaashaanbuuraysiga la ahaa madaxweyne Muuse Biixi ee bariga Burco.

Agaasimihii maamulka iyo lacagta iyo wasaarada warfaafinta Xasan Maxamed Maxamuud oo isagu haatan ku hadhay xabsiga ayaa dadka baraha bulshada ku falanqaynaya xadhigiisu waxay ku tilmaamayaan masuulkan oo ka jeeda gobolka Awdal inuu noqday looma ooyaan.

Waxa kale oo xusid mudan in xukuumada madaxweyne Muuse Biixi ay hore u xidhay laba wiil oo ka soo kala jeeda bariga Burco iyo galbeedka Burco kuwaas oo lagu eedeeyey inay ku kaceen falal anshax xumo ah balse mudo kooban ka dib xoriyadiisa loo celiyey wiilkii ka soo jeeday bariga Burco halka kii kalana mudo lagu sii hayey xabsiga, taas oo muujinaysa cadaala darada dalka sii ragaadinaysa.

Madaxweyne Muuse Biixi ayaa hore u sheegay inuu baabiin doono wax uu ugu yeedhay isgaashaanbuuraysiga jeegaanta balse shacabka somaliland badankiisa iyo xisbiyada siyaasada ayaa rumaysan inaanay muuqan fulinta balantaasi.

Marka laysku soo duubo waxa muuqata in loo baahan yahay inay nidaam cadaaladeed helaan maxaabiista ku jirta xabsiyada dalka oo qaarkood ay xanuuno la jiifaan, iyada oo agaasimihii wasaarada warfaafinta ee musuq maasuqa loo haystay uu haatan xadhigii kaga badbaaday arimo caafimaad oo loo haysto.