Garoowe(HWN):-Madaxweynaha maamulka Puntland Siciid Cabdilaahi Deni ayaa ka baaqday safar uu ku tagi lahaa magaalada Kismaayo ee xarunta maamulka Jubbaland.

Madaxweyne Deni ayaa dib uga dhacay safarkaas ka dib markii diyaarad ka qaadi lahayd magaalada Boosaaso ay ku wargelisay inay sii marayso magaalada Muqdisho ee xarunta dawlada federaalka ah.

Madaxweyne Deni ayaa go’aan ku gaadhay inaanu raacin diyaarad la sii marta magaalada Muqdisho isaga oo damacsan inuu toos uga dago xarunta Jubbaland ee Kismaayo.

Warar hada ka soo baxaya maamulka Puntland ayaa sheegaya in madaxweyne Deni uu maalinta bari ah raaci doono diyaaradii masuuliyiinta kale ka soo qaaday magaalada Nairobi taas oo haatan ku sugan garoonka diyaaradaha Garoowe oo ay caawa ku dhaxi doonto.

Dhinaca kale waxa natiijo la,aan ku dhamaaday kulan dhexmaray wasiiro ka tirsan dawlada federaalka ah iyo madaxweynaha Puntland kuwaas oo ka codsaday inuu ka baaqdo caleemo saarka madaxweynaha Jubbaland isla markaana uu wada shaqayn toos ah la yeesho dawlada dhexe, codsiyadaas oo uu ku gacan saydhay hogaamiyaha maamulka Puntland.