Togdheer (Hadhwanaagnews) – Wasiirka Wasaaradda Waxbarashada iyo Sayniska Somaliland, Prof. Ismaaciil Ducaale Yuusuf, ayaa kormeer shaqo ku soo maray deegaanno ka tirsan dhulka Hawdka ee gobolka Togdheer, isaga oo u kuurgalay xaaladda waxbarashada iyo baahiyaha ka jira deegaannada miyiga ah.

Wasiirka oo ay wehelinayeen masuuliyiin ka tirsan bahda waxbarashada ayaa booqday deegaannada Waraabeeye, Harada, Duruqsi, Nasiye, Cali Ciise, Bilcile iyo Dhoqoshay, halkaas oo bulshada deegaanku si diirran ugu soo dhaweeyeen.

Intii uu kormeerku socday, wasiirku waxa uu xog-ogaal u noqday xaaladda waxbarashada iyo baahiyaha ka jira deegaannadaasi, gaar ahaan caqabadaha haysta bulshada miyiga ah ee adeegyada waxbarashada.

Kormeerkan ayaa qayb ka ah dadaallada Wasaaradda Waxbarashada ee lagu qiimaynayo adeegyada waxbarasho iyo sidii fursado waxbarasho oo tayo leh loo gaadhsiin lahaa carruurta ku nool deegaannada fogfog ee dalka.