Florida (Hadhwanaagnews) – Ugu yaraan sagaal qof ayaa ku dhintay shil diyaaradeed oo ka dhacay xaafad ku taalla gobolka Florida ee dalka Maraykanka, sida uu sheegay Wasiirka Gaadiidka Maraykanka.

Shilkan ayaa Axaddii ka dhacay agagaarka Cresthaven, oo qiyaastii 14 kiiloomitir u jirta Mar-a-Lago, oo ah goobta uu Madaxweynaha Maraykanka, Donald Trump, ku leeyahay guriga nasashada, kuna taalla deegaanka hodanka ah ee Palm Beach County.

Sawirrada laga qaaday goobta uu shilku ka dhacay ayaa muujinaya god weyn oo ka dhex samaysmay waddo ay deggan yihiin dadweyne. Waxa kale oo sawirrada laga arkayaa meelo dab ka holcayo iyo burburka diyaaradda oo ku kala firirsan dhulka.

Diyaaradda shilka gashay ayaa ahayd nooca Learjet 60, taas oo ka duushay magaalada Austin ee gobolka Texas, iyadoo ku sii jeedday dalka Bahamas.

Sida lagu sheegay bayaan ay soo saartay Maamulka Duulista Hawada Federaalka ee Maraykanka (FAA), diyaaradda ayaa ku socotay safarkaas markii uu shilku dhacay.

Ilaa hadda, xogta la soo gudbiyey waxay xaqiijinaysaa dhimashada sagaal qof, mana jiraan faahfaahin dheeraad ah oo ku saabsan sababta rasmiga ah ee shilka iyo xaaladda dadka kale ee ay suurtagal tahay inuu saamayn ku yeeshay.