Hargeysa – Golaha Guurtida Jamhuuriyadda Somaliland ayaa dib ugu dhigay maalinta Salaasada ee toddobaadkan ka doodista Xeerka Ergooyinka Diblomaasiyadeed, kaddib markii Guddida Arrimaha Dibedda ee goluhu ay codsatay muddo saddex maalmood ah oo dheeraad ah si ay u dhammaystirto wax-ka-beddelka iyo kaabista xeerka.

Fadhigii saaka ee Golaha Guurtida, oo uu shir-guddoominayey Guddoomiyaha golaha, Mudane Muuse Xaaji Cabdi Ducaale, ayaa lagu go’aamiyey in guddidu dhammaystirto hawsha u hadhay, isla markaana ay xeerka golaha hor keento maalinta Salaasada.

Guddida Arrimaha Dibedda oo Codsatay Muddo Dheeraad ah

Markii uu furay fadhiga, Guddoomiyaha Golaha Guurtida ayaa Guddida Arrimaha Dibedda ka codsaday inay golaha la wadaagto halka ay marayso hawsha wax-ka-beddelka iyo kaabista Xeerka Ergooyinka Diblomaasiyadeed.

Hase yeeshee, Guddoomiyaha Guddida Arrimaha Dibedda, Mudane Cabdilqaadir Maxamed Xasan Indha-indho, ayaa sheegay inaanay guddidu weli diyaar u ahayn inay soo bandhigto hawsha ay qabatay, isaga oo codsaday in la siiyo saddex maalmood oo dheeraad ah si ay u dhammaystirto waxyaabaha ka dhiman xeerka.

Guddoomiyaha Golaha oo Aqbalay Codsiga Guddida

Guddoomiyaha Golaha Guurtida, Muuse Xaaji Cabdi Ducaale, ayaa aqbalay codsiga guddida, isaga oo u qabtay inay maalinta Salaasada dib ugu soo noqoto golaha iyadoo soo dhammaystirtay hawsha loo igmaday.

Go’aankan ayaa siinaya guddida wakhti dheeraad ah oo ay ku dhammaystirto diyaarinta xeerka ka hor inta aan golaha la hor keenin, si ay xildhibaannadu uga gutaan waajibaadkooda sharci-dejineed.

Sidaas darteed, ka doodista Xeerka Ergooyinka Diblomaasiyadeed ayaa loo muddeeyey Salaasada, iyadoo la sugayo in Guddida Arrimaha Dibeddu soo dhammaystirto wax-ka-beddelka iyo kaabista xeerka.