Xirsi Cali Xaaji Xasan oo Soo Dhaweeyey Madaxweyne Cirro, Bogaadiyeyna Dedaallada Aqoonsi-raadinta Somaliland

Visits: 40
(Rating 0.0/5 Stars) Total Votes: 0
0 0
Share via Social Media

Xirsi Cali Xaaji Xasan oo Soo Dhaweeyey Madaxweyne Cirro, Bogaadiyeyna Dedaallada Aqoonsi-raadinta Somaliland

Guddoomiyaha WADDANI ayaa xusay in shacabka Somaliland ay muddo dheer

Share

Guddoomiyaha WADDANI ayaa xusay in shacabka Somaliland ay muddo dheer

Guddoomiyaha xisbiga talada haya ee WADDANI, Mudane Xirsi Cali Xaaji Xasan, ayaa si diirran u soo dhaweeyey Madaxweynaha Jamhuuriyadda Somaliland, Cabdiraxmaan Maxamed Cabdillaahi (Cirro), iyo weftigiisa, isaga oo bogaadiyey dedaalladii ay u galeen arrimaha diblomaasiyadda iyo himilada aqoonsiga Somaliland.

Xirsi Cali Xaaji Xasan ayaa sheegay in maalintani muhiimad weyn u leedahay shacabka Somaliland, kuwaas oo muddo dheer sugayey in dedaallada aqoonsi-raadintu midho dhalaan, isla markaana farriinta Somaliland ay gaadho caalamka, gaar ahaan dalka Maraykanka.

Guddoomiyaha WADDANI ayaa xusay in shacabka Somaliland ay muddo dheer u taagnaayeen sidii caalamku u fahmi lahaa qaddiyaddooda, isaga oo Madaxweynaha iyo weftigiisa ku bogaadiyey dedaallada ay arrintaas ku bixiyeen.

"Waxaan soo dhawaynayaa Madaxweynaha Jamhuuriyadda Somaliland, waxaanan ku faraxsanahay dedaalkii isaga iyo weftigiisu sameeyeen. Waxaynu sugaynay dhawaqa guusha iyo midho-dhalka dedaalladoodii aynu muddada dheer soo wadnay. Maanta waa maalin weyn oo aynu halkan ku soo dhawaynayno Madaxweynaha, kuna dhiirrigelinayno guusha uu hoggaaminayo,” ayuu yidhi Xirsi Cali Xaaji Xasan.

Xirsi: Shacabka Somaliland Waxay Muddo Dheer Sugayeen Midho-dhalka Dedaallada Aqoonsi-raadinta

Guddoomiyaha xisbiga WADDANI ayaa sheegay in shacabka Somaliland ay muddo dheer u halgamayeen sidii loo garwaaqsan lahaa qaddiyaddooda, isaga oo xusay in madaxdii dalka soo martay iyo masuuliyiin kala duwan ay sannado badan dedaallo ugu jireen sidii farriinta Somaliland loo gaadhsiin lahaa bulshada caalamka.

"Maanta waa maalintii bulshada Somaliland ay in badan sugayeen inay guul dhagahooda ku maqlaan. Waa maalintii aynu u soo halgamaynay, waana maalintii madaxwaynayaashii ka horreeyey Madaxweynaha maanta ay wakhti badan geliyeen sidii Somaliland loo gaadhsiin lahaa meel fog oo farriinteeda laga garwaaqsado,” ayuu yidhi guddoomiyuhu.

Waxa uu hadalkiisa ku muujiyey in dedaallada aqoonsi-raadinta Somaliland ay yihiin kuwo soo socday muddo dheer, isla markaana ay qayb ka ahaayeen hawlaha ay qabteen hoggaamiyeyaashii kala dambeeyey ee dalka.

Mahadnaq loo Jeediyey Maraykanka iyo Dadka Taageera Somaliland

Xirsi Cali Xaaji Xasan ayaa sidoo kale carrabka ku adkeeyey muhiimadda ay leedahay in caalamku si wanaagsan u fahmo qaddiyadda Somaliland. Waxa uu mahadnaq u jeediyey Madaxweynaha Maraykanka iyo cid kasta oo uu sheegay inay taageertay dedaallada Somaliland.

Guddoomiyaha WADDANI ayaa ugu dambayn bogaadiyey dedaallada diblomaasiyadeed ee Madaxweynaha iyo weftigiisu sameeyeen, isaga oo muujiyey rajada uu ka qabo in dedaalladaasi ay wax ka tari doonaan himilada aqoonsiga Somaliland.

Fiiro gaar ah: Hadallada ku saabsan guusha iyo midho-dhalka aqoonsi-raadinta waxa loo soo gudbiyey sida uu Guddoomiyaha WADDANI u sheegay; qoraalkani si madax-bannaan uma xaqiijinayo in Somaliland ay aqoonsi cusub heshay.