Dowladda Mareykanka, oo uu hoggaamiyo Madaxweyne Donald Trump, ayaa Jimcihii cunaqabatayn cusub ku soo rogtay Maxkamadda Dambiyada Caalamiga ah (ICC), saacado uun kaddib markii garsoore hore oo ka tirsanaa maxkamadda, Navanethem "Navi” Pillay, lagu dhawaaqay inay ku guuleysatay Abaalmarinta Nobel Peace Prize ee sannadka 2026.

Guddiga Nobel-ka Norway ayaa sheegay in Pillay abaalmarinta lagu guddoonsiiyey dadaalkeeda ku aaddan horumarinta nabadda iyo sharciga caalamiga ah, iyo doorkeeda ku aaddan la xisaabtanka dambiyada dagaalka, dambiyada ka dhanka ah aadanaha iyo xasuuqa.

Cunaqabataynta cusub ayaa qayb ka ah tallaabooyinka maamulka Trump uu ku doonayo inuu ku xaddido hawlaha maxkamadda. Xoghayaha Arrimaha Dibadda Mareykanka, Marco Rubio, ayaa sheegay in Washington ay joojinayso macaamillada la xidhiidha ICC, isla markaana ay doonayso inay xaddido helitaanka maxkamadda ee adeegyada maaliyadeed iyo ilaha kale ee ay u baahan tahay si ay u shaqayso. Tallaabooyinka ayaa sidoo kale siinaya shirkadaha iyo shakhsiyaadka ay khusayso muddo lix bilood ah oo ay ku soo afjaraan macaamillada qaarkood.

Rubio ayaa hore u sheegay in maamulka Trump aanu aqbali doonin in ICC ay awooddeeda sharci ku fidiso muwaadiniinta Mareykanka. Washington ayaa muddo dheer ku doodaysay in maxkamaddu aanay awood u lahayn inay dacwad ku soo oogto muwaadiniin Mareykan ah, maadaama Mareykanku aanu qayb ka ahayn Heshiiska Rome ee lagu aasaasay ICC.

Khilaafka Mareykanka iyo maxkamadda ayaa muddo dheer soo jiray, gaar ahaan baadhitaannadii la xidhiidhay eedeymaha dambiyada dagaal ee Afghanistan. Maamulka Trump intii uu xilka hayay muddadii hore ayaa sannadkii 2020 cunaqabatayn iyo xayiraado fiiso ku soo rogay qaar ka mid ah saraakiisha ICC ee ku lug lahaa baadhitaannadaas, hase yeeshee maamulka Joe Biden ayaa markii dambe qaaday cunaqabatayntaas.

Dhankeeda, Maxkamadda Dambiyada Caalamiga ah ayaa cambaaraysay tallaabada cusub ee Mareykanka, iyadoo ku tilmaantay mid dhaawici karta madax-bannaanideeda iyo awoodda ay ugu gudanayso waajibaadkeeda sharci. Maxkamaddu waxay sheegtay inay sii wadi doonto hawlaheeda, iyadoo ku shaqaynaysa sharciga iyo caddeymaha, isla markaana diiradda saaraysa dhibbanayaasha dambiyada culus.

Mareykanku xubin kama aha Maxkamadda Dambiyada Caalamiga ah, mana aanu ansixin Heshiiska Rome. Taasi waxay saldhig u ahayd diidmada Washington ee awoodda maxkamadda, gaar ahaan marka ay baadhitaanno ku samaynayso muwaadiniin Mareykan ah ama saraakiil dalal ay Mareykanku xulafo yihiin. Cunaqabataynta cusub ayaa sii xoojinaysa khilaafka u dhexeeya Washington iyo hay’adda caalamiga ah ee qaabilsan dacwadaha dambiyada ugu culus.