Washington — Shaqaale hadda iyo kuwii hore uga tirsanaa Hay’adda Dembi-baarista Federaalka Maraykanka (FBI) ayaa walaac xooggan ka muujiyey weerar dhanka internet-ka ah oo la sheegay in xog xasaasi ah looga xaday kumannaan shaqaale iyo wakiillo ka tirsan hay’adda.

Kooxda jabsadayaasha ah ee loo yaqaan ShinyHunters ayaa sheegatay inay gudaha u gashay qaar ka mid ah nidaamyada FBI-da, iyadoo ku hanjabtay inay faafin doonto xogta ay sheegtay inay heshay, haddii aan hay’addu fulin shuruudo ay kooxdu dalbatay.

Xogta la sheegay in la helay ayaa la sheegay inay ka mid yihiin magacyada, cinwaannada, lambarrada telefoonka, xilalka shaqaalaha iyo macluumaad kale oo shaqsiyeed. Warbixinnada ayaa sidoo kale sheegaya in xog caafimaad oo xasaasi ah oo ku saabsan qaar ka mid ah shaqaalaha ay gacanta u geli karto kooxda jabsadayaasha.

Saraakiil hore uga tirsanaa FBI-da ayaa sheegay in haddii xogtan si khaldan loo adeegsado ay abuuri karto khataro kala duwan, oo ay ka mid yihiin khiyaanooyin dhanka internet-ka ah, hanjabaado, isku-dayo laaluush iyo weerarro si gaar ah loogu beegsado shaqaalaha iyo qoysaskooda.

Qaar ka mid ah saraakiishii hore ayaa sidoo kale ka digay in xogta shaqsiyeed loo adeegsan karo falal loo yaqaan "swatting”, oo ah in booliiska loogu diro cinwaan iyadoo loo gudbinayo warbixin been ah oo keenta in ciidamo hubaysan ay tagaan goobta.

Michael McPherson, oo hore uga tirsanaa FBI-da, ayaa sheegay in xog-jebintu ay khatar amni oo culus ku noqon karto shaqaalaha iyo qoysaskooda, maadaama xogta gaarka ahi ay u fududayn karto kooxaha doonaya inay bartilmaameedsadaan.

FBI-da ayaa xaqiijisay inay waddo baadhitaan ku saabsan dhacdo amni, balse faahfaahin dheeraad ah kama aysan bixin xogta la sheegay in la xaday ama qaabka ay jabsadayaashu ku heleen.

Dhanka kale, muunado xog ah oo ay ShinyHunters soo bandhigeen ayaa u muuqday inay ku jiraan macluumaad shaqsiyeed, hase yeeshee xaqiijinta baaxadda xogta la helay iyo dhammaan nuxurkeeda ayaa weli qayb ka ah baadhitaanka.

Khubaro dhanka amniga internet-ka ah ayaa sidoo kale ka digay in xogta xasaasiga ah, haddii ay mar hore internet-ka ku faafto, ay muddo dheer ku sii jiri karto shabakadaha internet-ka iyo meelaha qarsoon ee loo yaqaan Dark Web, taas oo sii kordhin karta khataraha ka dhasha xog-jebinta.