Johannesburg — Ugu yaraan 28 qof ayaa lagu dilay laba dhacdo oo kala duwan oo rasaas ah oo ka dhacay Koonfur Afrika dhammaadkii toddobaadkan, iyadoo booliisku ay wadaan baadhitaanno lagu raadinayo dadka looga shakisan yahay weerarrada.

Dhacdadii ugu horreysay ayaa ka dhacday Wedela, oo ku taalla galbeedka Johannesburg, halkaas oo 18 qof lagu dilay goob lagu caweeyo. Booliisku waxay sheegeen in koox hubaysan ay gudaha iyo bannaanka goobta rasaas ka furtay, waxaana sidoo kale la sheegay in qaar ka mid ah dadka goobta joogay laga qaatay taleefoonnadooda.

Booliiska gobolka Gauteng ayaa sheegay in dhimashadu markii hore ahayd 17 qof, balse qof kale oo dhaawacmay uu markii dambe ku dhintay isbitaal, taas oo tirada dhimashada ka dhigtay 18. Ilaa hadda ma jirto cid loo qabtay weerarka, waxaana socda baadhitaan ay wadajir uga qayb qaadanayaan cutubyo kala duwan oo ammaanka ah.

Dhacdada labaad ayaa ka dhacday Lwandle, oo u dhow magaalada Cape Town, halkaas oo 10 qof lagu dilay, 11 kalena lagu dhaawacay. Booliisku waxay sheegeen in kiiskan uu yahay dhacdo gooni ah, iyadoo aan weli la xaqiijin sababta rasmiga ah ee ka dambaysay.

Ciidamada ammaanka ayaa baaraya dhowr aragti oo la xidhiidha sababaha weerarrada, oo ay ka mid yihiin khilaafaadka kooxaha dambiyada abaabulan, hawlaha macdanta sharci-darrada ah iyo loollanka ganacsi. Si kastaba, booliisku weli ma aysan xaqiijin in labada weerar ay isku xidhan yihiin.

Dhacdooyinkan ayaa kusoo beegmaya xilli Koonfur Afrika ay wajahaysay weerarro kale oo hubaysan, taas oo sare u qaadday walaaca ku saabsan rabshadaha iyo isticmaalka hubka sharci-darrada ah ee dalka. Madaxweynaha Koonfur Afrika Cyril Ramaphosa ayaa cambaareeyay weerarrada, iyadoo laamaha ammaankana lagu amray inay xoojiyaan dadaallada lagu raadinayo dadka looga shakisan yahay.