Washington — Dukumeentiyo sir ah oo loo gudbiyey Kongareeska Maraykanka ayaa lagu sheegay in hay’adaha sirdoonka dalkaasi ay qiimeeyeen suurtagalnimada in Sacuudi Carabiya mustaqbalka ka fiirsato helitaanka hub nukliyeer ah.

Sida lagu xusay nuqul ka mid ah warbixinta, Riyaad ayaan weli qaadan go’aan rasmi ah oo ku saabsan samaynta hub nukliyeer ah, balse saraakiil Maraykan ah ayaa sheegay in Sacuudigu si dhow ula socdo xaaladaha amni ee mustaqbalka iyo fursadaha la xidhiidha awoodda nukliyeerka.

Saraakiisha sirdoonka Maraykanka ayaa sidoo kale sheegay in Washington muddo dheer qiimaynaysay danaha Sacuudiga ee dhinaca awoodda nukliyeerka, gaar ahaan xaaladda ka dhalan karta haddii Iiraan ay gaadho heer ay yeelato hub nukliyeer ah. Arrintan ayaa loo arkaa mid saamayn ku yeelan karta xisaabta amni ee dalalka gobolka.

Warbixinta ayaa walaac ka dhalisay qaar ka mid ah xubnaha Kongareeska Maraykanka, kuwaas oo si gaar ah isha ugu haya iskaashiga nukliyeerka ee Washington iyo Riyaad. Arrintan ayaa imanaysa xilli maamulka Madaxweyne Donald Trump uu Sacuudiga kala shaqaynayo heshiisyo la xidhiidha horumarinta barnaamijka tamarta nukliyeerka ee rayidka ah, iyadoo shirkado Maraykan ah ay qayb ka noqon karaan mashaariicdaas.

Si kastaba ha ahaatee, warbixinta sirdoonka ayaa kala saaraysa barnaamijka nukliyeerka ee rayidka ah iyo samaynta hub nukliyeer ah, mana muujinayso in Sacuudi Carabiya ay hadda bilowday qorshe rasmi ah oo ay ku samaysanayso hub nukliyeer ah.

Arrintan ayaa kusoo beegmaysa xilli xiisado iyo colaado ka jiraan qaybo badan oo Bariga Dhexe ah, iyadoo xaaladda awoodda nukliyeerka ee Iiraan iyo siyaasadaha amni ee dalalka gobolka ay weli yihiin arrimo si dhow ay ula socdaan Washington iyo xulafadeeda.