Hargeysa — Warbaahinta Taiwan ayaa si weyn uga warrantay aasaaska World Alliance for Disaster Management (WADM), oo ah isbahaysi caalami ah oo ay hormuud ka tahay Taiwan, iyadoo Somaliland ay ka mid noqotay xubnaha aasaasay ururkan cusub.

Madaxweynaha Taiwan, Lai Ching-te, ayaa 19-kii Sebtembar 2026 magaalada Taipei kaga dhawaaqay si rasmi ah aasaaska WADM, kaas oo diiradda saaraya xoojinta iskaashiga caalamiga ah ee dhinacyada u-diyaargarowga iyo ka-jawaabista masiibooyinka, tababarrada iyo hawlgallada wadajirka ah, is-dhaafsiga macluumaadka iyo iskaashiga gurmadka.

Sida ay sheegtay Wasaaradda Arrimaha Dibadda Taiwan, WADM waxa hadda ku jira 13 xubnood, 17 goobjooge iyo 11 shuraako, iyadoo xubnaha aasaasayaashu ay ka kooban yihiin Taiwan, 11-ka dal ee xidhiidhka diblomaasiyadeed la leh Taiwan iyo Somaliland. Dalal ay ka mid yihiin Maraykanka, Japan, Boqortooyada Ingiriiska, Jarmalka, Netherlands, Poland, Türkiye iyo Filibiin ayaa ka qaybgalaya iyaga oo ah goobjoogayaal ama shuraako.

Warbaahinta Taiwan ayaa tilmaantay in WADM uu noqonayo madal ay dowlado, hay’ado maaraynta masiibooyinka iyo dhinacyo kale oo caalami ahi ku wada shaqeeyaan, iyadoo qorshayaashu ay ka mid yihiin tababbarro iyo layliyo wadajir ah, is-caawinta, digniinta hore, ka-jawaabista xaaladaha degdegga ah iyo soo-kabashada musiibooyinka.

Ka-qaybgalka Somaliland ee ururkan ayaa imanaya xilli ay wafdi Somaliland ah oo uu hoggaaminayo Wasiirka Arrimaha Gudaha iyo Amniga, Cabdalle Maxamed Carab, ka qaybgalay shirarka WADM ee lagu qabtay Taipei. Wafdiga ayaa sidoo kale ka qaybgalay madasha Resilient Taiwan for Sustainable Democracy, halkaas oo lagu shaaciyey aasaaska isbahaysiga.

Warbixin ay Taiwan News daabacday 24-kii Sebtembar ayaa sidoo kale sheegtay in iskaashiga Somaliland iyo Taiwan uu ku sii fidayo dhinacyada caafimaadka, horumarinta xirfadaha, arrimaha ilaalada xeebaha iyo beeraha. Wasiirka Arrimaha Gudaha Somaliland, Cabdalle Maxamed Carab, ayaa sheegay in xidhiidhka labada dhinac uu sii ballaaranayo tan iyo markii la sameeyey xafiisyada wakiillada labada dhinac.

Aasaaska WADM ayaa sidaas darteed Somaliland siinaya ka-qaybgal rasmi ah oo ku saabsan madal caalami ah oo diiradda saareysa maaraynta iyo ka-hortagga masiibooyinka, iyadoo iskaashiga lagu salaynayo tababbarro, xog-wadaag, khibrad farsamo iyo isku-duwidda gurmadka. Dowladda Taiwan ayaa sheegtay in ujeeddada guud ee isbahaysigu tahay in la xoojiyo iskaashiga dalalka iyo hay’adaha ku hawlan ka-hortagga iyo maaraynta masiibooyinka.