CIA-da Mareykanka Oo Qaahira Kula Kulantay Madaxweynaha Masar, Lagana Wada Hadlay Suudaan, Soomaaliya iyo Amniga Badda
0
- Visits: 53
-
- Share
Qaahira — Madaxweynaha Masar, Abdel Fattah El-Sisi, iyo Agaasimaha Hay’adda Sirdoonka Dhexe ee Mareykanka (CIA), John Ratcliffe, ayaa 20-kii Sebtembar magaalada Qaahira ku yeeshay kulan looga hadlay xaaladaha amni iyo siyaasadeed ee gobolka.
Kulanka oo uu sidoo kale ka qayb galay madaxa Sirdoonka Guud ee Masar, Hassan Rashad, ayaa lagu sheegay in lagu falanqeeyay xiriirka istiraatiijiga ah ee Masar iyo Mareykanka, iskaashiga dhinacyada sirdoonka iyo amniga, iyo dadaallada lagula dagaallamayo argagixisada, dambiyada abaabulan iyo dambiyada ka gudba xuduudaha.
Arrimaha ugu muhiimsanaa ee kulanka looga hadlay waxaa ka mid ahaa dagaalka ka socda Suudaan. Madaxweyne El-Sisi ayaa mar kale sheegay in Masar ay taageersan tahay midnimada, xasilloonida iyo hay’adaha qaranka Suudaan, isaga oo adkeeyay muhiimadda ilaalinta madax-bannaanida iyo wadajirka dhuleed ee dalkaasi.
El-Sisi ayaa sidoo kale sheegay in Masar ay qayb ka tahay dadaallada gobolka iyo kuwa caalamiga ah ee lagu doonayo in lagu soo afjaro dagaalka Suudaan, lagu yareeyo dhibaatada shacabka iyo in la gaaro xal siyaasadeed.
Kulanka waxaa sidoo kale looga hadlay xaaladda Soomaaliya iyo guud ahaan Geeska Afrika. Madaxweynaha Masar ayaa sheegay in dalkiisu taageerayo dadaallada lagu xoojinayo amniga iyo xasilloonida Soomaaliya, isaga oo ka hadlay muhiimadda ilaalinta madax-bannaanida iyo wadajirka dhuleed ee Soomaaliya.
Dhanka kale, Ratcliffe ayaa carrabka ku adkeeyay muhiimadda ay leedahay in Mareykanka iyo Masar ay sii wadaan wada-shaqeynta ku saabsan xaaladda Suudaan, Soomaaliya, Geeska Afrika iyo amniga maraakiibta caalamiga ah.
Labada dhinac ayaa sidoo kale ka wada hadlay xaaladaha Gaza iyo Iran. Madaxweyne El-Sisi ayaa ku baaqay in si buuxda loo dhaqan geliyo wejiga labaad ee qorshaha xabbad-joojinta Gaza, lana xaqiijiyo ilaalinta shacabka iyo in gargaarka bani’aadannimo uu si ku filan oo aan caqabad lahayn u gaaro dadka ku nool Gaza.
Masar ayaa sheegtay in Ratcliffe uu bogaadiyay doorka Qaahira ee dadaallada lagu xoojinayo xabbad-joojinta Gaza iyo horumarinta geeddi-socodka nabadda.
