Paris – Faransiiska ayaa wada dadaallada lagu qabanayo shir caalami ah oo looga hadlayo mustaqbalka hawada sare, iyadoo Madaxweynaha Faransiiska Emmanuel Macron uu doonayo in Yurub ay door xooggan ka qaadato tartanka sii kululaanaya ee dhinaca hawada sare.

Shirka Caalamiga ah ee Hawada Sare ayaa lagu qabanayaa magaalada Paris 9-ka iyo 10-ka September, waxaana qabanqaabiyayaashu sheegeen in lagu martiqaaday go’aan-qaadayaal, shirkado iyo saynisyahanno ka kala socda 120 dal.

Shirka ayaa diiradda lagu saari doonaa xoojinta iskaashiga caalamiga ah iyo sidii loo horumarin lahaa xeerarka lagu maamulo hawada sare, iyadoo ay ka qaybqaadanayaan dhinacyo ka kala socda quwadaha waaweyn ee ku tartamaya hawada sare, oo ay ku jiraan Maraykanka iyo Shiinaha.

Hase yeeshee, ka qaybgalka Maraykanka ayaa hoos u dhacay, kaddib markii afar shirkadood oo waaweyn oo Maraykan ah oo ka shaqeeya hawada sare ay ka baaqsadeen shirka. Sida Reuters sheegtay, walaaca Aqalka Cad ee ku saabsan ajandaha shirka oo loo arkay inuu u janjeedho dhinaca Yurub ayaa qayb ka ahaa sababaha ka dambeeyey maqnaanshaha shirkadahaasi.

Shirkadaha ka baaqday waxaa ka mid ah SpaceX, oo uu leeyahay Elon Musk, iyo Blue Origin, oo uu leeyahay Jeff Bezos. Ilo xog-ogaal ah ayaa sheegay in ka bixitaanka shirkadahaasi uu meesha ka saaray qorshayaal dhowr ah oo la filayey in lagu dhawaaqo intii uu shirku socday.

Dhinaca Yurub, Jarmalka oo si rasmi ah ula guddoominaya shirka Faransiiska ayaa sheegay in Chancellor Friedrich Merz aanu ka qaybgalayn sababo la xidhiidha waajibaadyo kale. Labada dal ayaa muddooyinkii dambe siyaasad ahaan ku kala aragti duwanaa arrimo la xidhiidha siyaasadda hawada sare.

Sidoo kale, Ra’iisul Wasaaraha Talyaaniga Giorgia Meloni ayaan ka qaybgalayn shirka, sida uu xaqiijiyey xafiiskeeda, taas oo sii yaraynaysa tirada hoggaamiyeyaasha Yurub ee ka qaybgalaya shirkan oo Faransiisku doonayo inuu ku xoojiyo doorka Yurub ee tartanka hawada sare.