Afhayeenka Madaxweynaha Jamhuuriyadda Somaliland, Xuseen Aadan Cige (Dayr), ayaa soo bandhigay toddoba qodob oo uu sheegay inay saldhig u yihiin sababta Somaliland ugu qalanto aqoonsi caalami ah.

Afhayeenka Madaxweynaha oo qoraal ku baahiyey bartiisa X, kaas oo ay soo xigatay Wakaaladda Wararka Somaliland ee SOLNA, ayaa diiradda saaray taariikhda dawladnimo ee Somaliland, rabitaanka shacabka, jiritaanka hay’adaha dawliga ah, nabadda, dimuqraadiyadda iyo fursadaha istaraatiijiga ah ee ka dhalan kara aqoonsiga Somaliland.

Qodobka koowaad ayuu ku sheegay taariikhda dawladnimo ee Somaliland, isaga oo xusay in Somaliland ay ahayd dal madax-bannaan oo leh xuduudo qeexan iyo hay’ado dawli ah 26-kii June 1960-kii, ka hor intii aanay midow la gelin Soomaaliya.

Qodobka labaad ayuu ku tilmaamay rabitaanka shacabka Somaliland, isaga oo sheegay in shacabka Somaliland, iyagoo adeegsanaya waajibaadkooda dastuuriga ah, ay ka qaybqaateen doorashooyinka dalka ka dhacay, isla markaana ay go’aamiyeen mustaqbalkooda siyaasadeed.

Qodobka saddexaad ayaa ku saabsan jiritaanka iyo shaqaynta hay’adaha dawliga ah. Afhayeenku wuxuu sheegay in Somaliland dhisatay hay’ado dawli ah oo shaqeeya, nidaam dastuuri ah iyo hannaan siyaasadeed oo horseeday isbeddello awoodda ah oo si nabad ah u dhacay.

Qodobka afraad ayuu ku sheegay nabadda Somaliland, isaga oo tilmaamay in lagu dhisay hannaan gudaha ah oo ku salaysan dib-u-heshiisiin, wada-hadal iyo hay’ado ay bulshadu leedahay, taas oo uu ku tilmaamay tusaale muujinaya sida nabad waarta looga dhisi karo gudaha.

Qodobka shanaad ayaa diiradda lagu saaray doorashooyinka, xil-wareejinta nabadeed iyo ku-dhaqanka dastuurka, kuwaas oo uu Afhayeenku ku sheegay inay ka mid yihiin astaamaha lagu garto nidaamka siyaasadeed ee Somaliland.

Qodobka lixaad ayuu ku qeexay awoodda dawladnimo ee Somaliland, isaga oo tilmaamay inay leedahay astaamaha aasaasiga ah ee dawlad wax-ku-ool ah, kuwaas oo ay ka mid yihiin dhul, shacab, xukuumad, awood maamul iyo awood ay kula macaamisho bulshada caalamka.

Qodobka toddobaad ayaa ku saabsan fursadaha istaraatiijiga ah ee ka dhalan kara aqoonsiga Somaliland. Sida uu Afhayeenku sheegay, aqoonsiga Somaliland wuxuu rasmiyeeyn karaa xaqiiqada siyaasadeed ee muddo dheer ka jirtay gobolka, isla markaana wuxuu furi karaa waddooyin cusub oo lagu xoojin karo nabadda iyo amniga Geeska Afrika, laguna kobcin karo ganacsiga, maalgashiga iyo iskaashiga istaraatiijiga ah ee gobolka.

Gabagabadii, Afhayeenka Madaxweynaha Somaliland, Xuseen Aadan Cige (Dayr), ayaa sheegay in Somaliland ay dunida ka doonayso in si rasmi ah loo aqoonsado dawladnimada ay shacabkeedu dhisteen, isla markaana ay muddo dheer difaacayeen.