Hargeysa (Hadhwanaagnews.com): Ciidanka Dab-demiska iyo Samatabixinta Somaliland ayaa muwaadin 45 jir ah ka soo badbaadiyey Dooxa Weyn ee Hargeysa, xilli uu daad xooggan socday.

Ciidanka ayaa muwaadinka oo laga soo saaray goobta daadku marayey u gudbiyey Cisbitaalka Guud ee Hargeysa, si loo siiyo daryeel caafimaad.

Ciidanka Dab-demiska iyo Samatabixinta ayaa bulshada iyo gaadiidleyda ugu baaqay inay xilliyada roobabka ka fogaadaan dooxyada, laagaha iyo goobaha ay maraan biyaha fatahaaduhu, si looga fogaado khataraha ka dhasha daadadka.

Ciidanku waxa uu sidoo kale bulshada xusuusiyey in qofkii la kulma musiibo dab ama u baahan samatabixin degdeg ah uu wici karo lambarka gurmadka 990, kaas oo ay ka heli karaan macaamiisha shirkadaha Telesom, Somtel iyo Soltelco.

Lambarka 990 ayaa lagu sheegay inuu yahay adeeg gurmad oo 24 saacadood shaqeeya, iyadoo hawl-wadeennada Qolka Hoggaaminta Ciidanka ay heegan u yihiin ka jawaabista xaaladaha degdegga ah.