Hargeysa – Agaasimaha Waaxda Diiwaangelinta Xafiiska Xeer-ilaalinta Qaranka, Mudane Xasan Mooge Cali, ayaa meesha ka saaray wararka sheegaya inuu jiro khilaaf shaqo oo u dhexeeya Xafiiska Xeer-ilaalinta Qaranka iyo Wasaaradda Warfaafinta Somaliland.

Xasan Mooge Cali ayaa sheegay in labada hay’adood aanu wax khilaaf shaqo ah ka dhexayn, isagoo yidhi:

"Ma jiro wax khilaaf ah oo u dhexeeya Wasaaradda Warfaafinta iyo Xeer-ilaalinta Qaranka.”

Hadalkan ayaa ka soo baxay kulan warbaahineed oo si wadajir ah ay u qabteen Agaasimaha Guud ee Wasaaradda Warfaafinta iyo masuuliyiin ka tirsan Xafiiska Xeer-ilaalinta Qaranka, kaas oo lagu beeniyey wararka iyo hadallada sheegayay in khilaaf shaqo uu soo kala dhexgalay labada dhinac.

Masuuliyiinta ayaa bulshada u caddeeyey in labada hay’adood ay si wadajir ah u gudanayaan waajibaadkooda shaqo, isla markaana ay mudnaanta siinayaan iskaashiga, wada-shaqaynta iyo gudashada masuuliyadaha qaranka.

Sidoo kale, kulanka ayaa lagu faahfaahiyey sida labada dhinac u wajahayaan arrimaha shaqo ee la xidhiidha diiwaangelinta Saxaafadda, iyadoo masuuliyiintu sheegeen in hawlahaasi ay ku socdaan wada-shaqayn iyo isku-duwid u dhexaysa hay’adaha ay khusayso.