Hargeysa – Wasiirka Wasaaradda Gaadiidka iyo Horumarinta Jidadka Somaliland, Mudane Cismaan Ibraahim Nuur (Afgaab), oo uu wehelinayay Agaasimaha Waaxda Gaadiidka iyo Farsamadda, ayaa kulan shaqo la yeeshay ganacsatada Badmaal iyo Iskaashatada Gaadiidka Xamuulka ee ka hawlgasha jidka Lawyo-cad, Saylac iyo gobollada kale ee dalka.

Kulanka ayaa diiradda lagu saaray sidii kor loogu qaadi lahaa tayada adeegyada gaadiidka xamuulka, loo dardargelin lahaa hawlaha Iskaashatada Tawakal, isla markaana loo fududayn lahaa isu-socodka badeecadaha iyo saadka gudaha dalka.

Labada dhinac ayaa sidoo kale ka wada hadlay xoojinta wada-shaqaynta u dhexeysa Wasaaradda Gaadiidka iyo iskaashatada gaadiidka xamuulka, si loo horumariyo adeegyada gaadiidka loona taageero koboca ganacsiga iyo isu-socodka badeecadaha.

Gabagabadii kulanka, Wasiirka iyo wakiillada ganacsatada ayaa ku heshiiyey in la sii wado kulamada wada-tashiga iyo iskaashiga joogtada ah, si loo horumariyo adeegyada gaadiidka xamuulka loona xoojiyo xiriirka shaqo ee u dhexeeya wasaaradda iyo iskaashatada.