Xukuumadda Jamhuuriyadda Somaliland ayaa shacabka ugu baaqday in la fududeeyo guurka dhalinyarada, iyadoo ku adkaysay muhiimadda ay leedahay in la yareeyo caqabadaha dhaqaale iyo bulshada ee hortaagan dhismaha qoysaska cusub.

Sida ay xukuumaddu sheegtay, khudbadaha salaadda Jimcaha ee berri ayaa si gaar ah diiradda loogu saari doonaa wacyigelinta bulshada ee ku saabsan fududeynta guurka, iyadoo culimada dalka laga codsaday inay shacabka ku baraarujiyaan fadliga guurka iyo baahida loo qabo in laga fogaado dhaqamada culayska ku noqda lammaanayaasha doonaya inay qoys dhistaan.

Xukuumaddu waxay sheegtay in korodhka kharashaadka la xidhiidha meherka, aroosyada iyo xafladaha kale ay ka mid yihiin waxyaabaha dib u dhigaya guurka dhalinyaro badan, taas oo saamayn ku yeelan karta xasilloonida bulshada iyo dhismaha qoysaska.

Waxa ay sidoo kale ugu baaqday waalidiinta, odayaasha, culimada iyo guud ahaan bulshada inay iska kaashadaan dhiirrigelinta guurka fudud, iyagoo xusay in arrintaasi ay waafaqsan tahay qiyamka Islaamka isla markaana door muhiim ah ka qaadan karto ilaalinta anshaxa bulshada iyo xoojinta qoysaska.

Baaqan ayaa imanaya iyadoo Wasaaradda Diinta iyo Awqaafta ay hore u shaacisay qorshe lagu wacyigelinayo bulshada, kaas oo khudbadaha Jimcaha looga hadlayo muhiimadda fududeynta guurka iyo ka fogaanshaha caadooyinka adkeeya guurka.