Kooxaha gurmadka ee dalka Japan ayaa weli wada hawlgallo ballaadhan oo lagu baadi-goobayo laguna soo badbaadinayo dadka ku xaniban burburka guryaha, xarumaha ganacsiga iyo dhismayaasha kale, kaddib dhulgariir xooggan oo cabbirkiisu ahaa 7.1 oo ku dhuftay Gobolka Kumamoto ee jasiiradda Kyushu.

Wararkii ugu dambeeyey ayaa muujinaya in tirada dadka ku dhintay dhulgariirka ay gaadhay ugu yaraan 18 qof, halka in ka badan 60 qof ay ku dhaawacmeen, iyadoo weli la la’yahay dad kale oo ku hoos jira burburka dhismayaasha. Kooxaha samatabbixinta, Ciidamada Is-difaaca Japan iyo hay’adaha gurmadka ayaa si isdaba joog ah uga shaqaynaya goobaha ay dhibaatadu ka dhacday.

Ra’iisul Wasaaraha Japan, Sanae Takaichi, ayaa sheegay in mudnaanta koowaad ee dowladda ay tahay badbaadinta dadka ku xaniban burburka, isagoo faray dhammaan hay’adaha dowladda inay dardargeliyaan gurmadka iyo gaadhsiinta gargaarka deegaannada ay dhibaatadu saamaysay.

Hawlgallada ugu culus ayaa ka socda xarun ganacsi oo ku taal Kumamoto, halkaas oo ay burbur iyo qarax la xidhiidha daadashada gaaska ka dhaceen kadib dhulgariirka, iyadoo sidoo kale warshado iyo dhismayaal kale ay soo gaadheen khasaare baaxad leh.

Dhulgariirka ayaa sababay hakad ku yimid adeegyada tareennada, qaar ka mid ah duullimaadyada garoomada diyaaradaha, korontada iyo biyaha, halka kumannaan qof loo daadgureeyey xarumaha hoyga ku-meelgaarka ah. Masuuliyiintu waxay sidoo kale ka digeen suurtagalnimada dhulgariirro daba socda iyo dhul-go’yo ka dhasha roobabka iyo gariirrada isdaba jooga ah.