Guddida Tacliinta Sare ee Jamhuuriyadda Somaliland ayaa casuumad sharafeed u samaysay madaxda Jaamacadda Jimma ee dalka Itoobiya, iyagoo bogaadiyey xidhiidhka waxbarasho iyo iskaashiga tacliimeed ee ka dhexeeya jaamacadda iyo jaamacadaha Somaliland.

Kulanka ayaa lagu muujiyey muhiimadda ay leedahay sii xoojinta iskaashiga dhinacyada tacliinta sare, cilmi-baadhista, hal-abuurka iyo is-dhaafsiga khibradaha, kuwaas oo door weyn ka qaata horumarinta tayada waxbarashada ee labada dhinac.

Masuuliyiinta Guddida Tacliinta Sare ayaa ku ammaanay Jaamacadda Jimma doorka ay ka qaadanayso horumarinta xidhiidhka tacliimeed iyo cilmi-baadhista, iyagoo xusay in iskaashiga noocan ahi uu abuuro fursado cusub oo ay ka faa’iidaystaan ardayda, macallimiinta iyo hay’adaha waxbarashada sare.

Casuumaddan ayaa ka tarjumaysa dadaallada ay Guddida Tacliinta Sare ee Somaliland ku xoojinayso xidhiidhka ay la leedahay jaamacadaha gobolka iyo kuwa caalamiga ah, si kor loogu qaado tayada waxbarashada sare, cilmi-baadhista iyo iskaashiga tacliimeed.