Jaamacadda Camuud ee Somaliland iyo Jaamacadda Jimma ee dalka Itoobiya ayaa kala saxeexday heshiis is-afgarad (MoU) oo lagu xoojinayo iskaashiga dhinacyada tacliinta sare, cilmi-baadhista, hal-abuurka iyo horumarinta aqoonta.

Heshiiska ayaa dhigaya in labada jaamacadood ay iska kaashadaan kor u qaadista tayada waxbarashada sare, horumarinta cilmi-baadhista, dhiirrigelinta hal-abuurka iyo fulinta barnaamijyo ay si wadajir ah uga faa’iidaysan doonaan labada dhinac.

Sidoo kale, heshiiska waxaa qayb muhiim ah ka ah is-weydaarsiga ardayda iyo macallimiinta, iyadoo la doonayo in la abuuro fursado lagu wadaago khibradaha, aqoonta iyo dhaqamada waxbarasho ee labada jaamacadood.

Masuuliyiinta labada jaamacadood ayaa sheegay in heshiiskan uu xoojinayo xidhiidhka tacliimeed ee u dhexeeya labada hay’adood, isla markaana uu door weyn ka qaadan doono horumarinta tayada waxbarashada sare, cilmi-baadhista iyo iskaashiga gobolka.