Wasaaradda Hawlaha Guud, Dhulka iyo Guriyeynta Jamhuuriyadda Somaliland ayaa bilowday olole lagu dardargelinayo bixinta kirada guryaha dowladda ee magaalada Hargeysa, si loo xoojiyo maamulka hantida qaranka iyo ilaalinta xuquuqda dowladda.

Shaqaalaha Waaxda Guriyeynta ee Wasaaradda ayaa bilaabay kormeerro iyo wacyigelin ay ka wadaan xaafadaha kala duwan ee caasimadda, iyagoo ugu baaqaya dadka iyo ganacsiyada ku jira guryaha dowladda inay si waafaqsan sharciga u gutaan waajibaadka kirada.

Wasaaraddu waxay sheegtay in ololahan uu qayb ka yahay qorshe ballaadhan oo lagu hagaajinayo maaraynta hantida dowladda, kor loogu qaadayo isla-xisaabtanka, lana xaqiijinayo in hantida qaranka si hufan looga faa’iideysto.

Masuuliyiinta Wasaaradda ayaa sidoo kale adkeeyey in dadaalladan lagu xoojinayo ilaalinta hantida guud iyo kobcinta dakhliga dowladda, si loo horumariyo adeegyada bulshada iyo maamulka hufan ee hantida qaranka.