Afhayeenka Madaxweynaha Jamhuuriyadda Somaliland, Xuseen Aadan Cige (Deyr), ayaa sheegay in waddaniyaddu tahay waajibaadka ugu sarreeya ee saaran muwaadin kasta, isla markaana aan lagu cabbirin xisbi siyaasadeed ama mansab, balse lagu qiimeeyo sida hagar la’aanta ah ee loogu adeego danta qaranka iyo ilaalinta madaxbannaanida Somaliland.

Afhayeenka ayaa xusay in xilliyada dalka ay soo wajahaan duruufo muhiim ah ay lagama maarmaan tahay in muwaadiniintu ka gudbaan kala aragti duwanaanshaha siyaasadeed, kana fogaadaan wax kasta oo keeni kara kala qaybsanaan iyo tabar-darro ku timaadda midnimada bulshada.

Qoraal uu ku baahiyey bartiisa X (Twitter), ayuu ku sheegay in waddaniyaddu aanay ku koobnayn hadallo oo keliya, balse ay tahay ficil muuqda oo lagu difaacayo qaranimada, madax-bannaanida iyo dadaallada lagu horumarinayo aqoonsi-raadinta Somaliland.

Afhayeen Deyr ayaa ugu dambayn sheegay in taariikhdu xusi doonto shacabka doorka muuqda ka qaata ilaalinta midnimada, danta qaranka iyo himilooyinka Somaliland, isagoo ku baaqay in laga fogaado wax kasta oo horseedi kara khilaaf iyo kala qaybsanaan bulshada dhexdeeda.