Wasiirka Wasaaradda Dhallinyarada iyo Ciyaaraha Jamhuuriyadda Somaliland, Axmed Yaasiin Maxamed Faarax, ayaa sheegay in mashruuca lagu macaanaynayo biyaha badda ee magaalada Saylac uu yahay mashruucii ugu horreeyey ee noociisa ah ee laga hirgeliyo Somaliland.

Wasiirku waxa uu sheegay in si rasmi ah loo dhagax-dhigay mashruucan, kaas oo loogu talagalay in wax lagaga qabto baahida biyaha ee ka jirta magaalada Saylac, isla markaana bulshada deegaanka loo helo biyo nadiif ah oo waara.

Waxa uu xusay in mashruucan uu faa’iido weyn u yeelan doono shacabka Saylac, isaga oo ka qayb qaadan doona yaraynta biyo-yaraanta muddada dheer ka jirtay magaalada.

Mashruuca macaanaynta biyaha badda waxaa si wadajir ah u hirgelinaya Wasaaradda Horumarinta Biyaha Jamhuuriyadda Somaliland iyo hay’adda Qatar Charity, iyadoo la filayo inuu door muhiim ah ka qaato horumarinta adeegyada biyaha ee deegaanka.

Wasiir Axmed Yaasiin Maxamed Faarax ayaa ugu dambayn uga mahadceliyey Madaxweynaha Jamhuuriyadda Somaliland hirgelinta mashruucan, isaga oo ku tilmaamay tallaabo muhiim ah oo kor u qaadaysa horumarka iyo tayada nolosha bulshada magaalada Saylac.