Maxkamad ku taalla bariga Shiinaha ayaa xukun dil ah ku ridday Yang Youlin, oo ahaa sarkaal hore oo ka tirsanaa maamulka horumarinta dhaqaalaha magaalada Nanjing, kadib markii lagu helay musuqmaasuq iyo qaadashada laaluush lagu qiyaasay in ka badan 2.2 bilyan yuan (qiyaastii 325 milyan oo doollar).

Yang Youlin, oo xilal kala duwan ka soo qabtay magaalada Nanjing intii u dhexaysay 1993 illaa 2023, ayaa sidoo kale lagu helay dambiyo ay ka mid yihiin ku-takrifalka awoodda, musuqmaasuqa hantida dowladda iyo lacag dhaqid.

Baaritaanka lagu sameeyey ayaa lagu ogaaday inuu xilkiisa u adeegsaday fududaynta qandaraasyo dhisme, wareejinta dhulal iyo maalgelinno kala duwan, isaga oo taa beddelkeeda qaadan jiray lacago iyo hadiyado qaali ah.

Maxkamaddu waxay sheegtay in dambiyada Yang ay ahaayeen kuwo aad u culus, isla markaana dhaawac weyn u geystay danaha dowladda iyo shacabka Shiinaha.

Kiiskan ayaa qayb ka ah ololaha adag ee Madaxweynaha Shiinaha, Xi Jinping, uu kula dagaallamayo musuqmaasuqa, kaas oo sannadihii u dambeeyey lagu bartilmaameedsaday saraakiil sare oo ka tirsan dowladda, ciidamada iyo hay'adaha maaliyadda.