Xukuumadda Jamhuuriyadda Somaliland ayaa hambalyo u dirtay Dowladda iyo shacabka Maraykanka munaasabadda 250-guurada ka soo wareegtay maalintii uu dalku qaatay xornimada.

Qoraal ay soo saartay Somaliland ayaa lagu sheegay in labada dhinac ay ka dhexeeyaan xidhiidh ku dhisan is-ixtiraam iyo dano wadaag, iyadoo la adkeeyey sida ay Somaliland uga go’an tahay sii xoojinta xidhiidhka iyo iskaashiga ay la leedahay Maraykanka.

Somaliland ayaa sidoo kale muujisay rajada ay ka qabto in labada dal ay sii ballaadhiyaan wada-shaqaynta dhinacyada nabadda, horumarka, barwaaqada iyo iskaashiga caalamiga ah, iyada oo lagu salaynayo qiyamka ay wadaagaan iyo xidhiidhka sii kobcaya ee u dhexeeya labada shacab.