Guddoomiyaha Golaha Wakiillada Somaliland ayaa si rasmi ah ugu dhawaaqay in Golaha Wakiilladu galay fasaxii dastuuriga ahaa, kaddib markii la soo gebagebeeyey Kal-fadhigii 14-aad ee Golaha.

Fasaxan oo ku salaysan Dastuurka iyo Xeer-hoosaadka Golaha Wakiillada ayaa socon doona muddo siddeed toddobaad ah, waxaana muddadaas lagu hakinayaa fadhiyadii caadiga ahaa ee Golaha.

War-saxaafadeedka ka soo baxay Golaha ayaa lagu wargeliyey dhammaan mudanayaasha Golaha, Guddida Joogtada iyo Anshaxa, iyo Xoghayaha Guud, si ay ula socdaan bilowga fasaxa iyo dib u bilaabashada shaqada Golaha marka muddadu dhammaato.

Golaha Wakiillada ayaa la filayaa inuu dib u bilaabo kal-fadhigiisa xiga marka uu dhammaado fasaxa dastuuriga ah, iyadoo mudanayaashu markaas dib ugu laaban doonaan gudashada waajibaadkooda sharci-dejinta iyo kormeerka hay'adaha dowladda.