Degmada Oodweyne ee Gobolka Daadmadheedh ayaa saaka si rasmi ah uga bilaabmay Imtixaanaadka Shahaadiga ah ee fasalka 8-aad ee dugsiyada dhexe iyo fasalka 4-aad ee dugsiyada sare.

Ardayda u fadhiisatay imtixaannada ayaa galay xarumaha iyo dugsiyada loo asteeyey, iyadoo jawigu ahaa mid deggan, isla markaana ay socdeen dhammaan diyaar-garowgii loo baahnaa.

Masuuliyiinta oo Kormeer Ku Tagay Xaruumaha Imtixaanka

Masuuliyiinta Gobolka Daadmadheedh iyo maamulka Degmada Oodweyne ayaa kormeer ku maray xarumaha lagu qabanayo imtixaannada, si ay u hubiyaan habsami-u-socodka imtixaanka iyo in ardaydu ku galaan jawi deggan oo ammaan ah.

Waxay masuuliyiintu ku bogaadiyeen maamulka waxbarashada, macallimiinta iyo guddiyada imtixaanka sida ay u diyaariyeen qabsoomidda imtixaanka.

Dardaaran Ku Socda Ardayda

Ardayda u fadhiisatay imtixaanka ayaa lagu dardaarmay inay ilaaliyaan anshaxa iyo xeerarka imtixaanka, kana fogaadaan wax kasta oo wax u dhimi kara hufnaanta imtixaanka.

Sidoo kale, waxaa lagu boorriyey inay ku kalsoonaadaan aqoontii iyo dadaalkii ay muddada dheer soo barteen.

Duco iyo Guul Loo Rajeeyey Ardayda

Maamulka waxbarashada ayaa ugu dambayn dhammaan ardayda u rajeeyey guul iyo nasiib-wanaag, iyagoo muujiyey kalsooni ay ku qabaan in imtixaannadu u qabsoomi doonaan si hufan oo nidaamsan.