Jamhuuriyadda Somaliland, Cabdiraxmaan Maxamed Cabdillaahi (Cirro), ayaa sheegay in Somaliland ay mustaqbalka u furan tahay martigelinta saldhig ciidan oo Israa’iil leedahay, haddii ay labada dhinac ku heshiiyaan arrintaas.

Sida ay qortay warbaahinta Israa’iil ee i24 News, Madaxweyne Cirro ayaa sidoo kale sheegay in duulimaadyo toos ah oo u dhexeeya Hargeysa iyo Tel Aviv ay dhawaan bilaaban doonaan.

Warbixinta ayaa sheegtay in arrinta saldhigga militariga lagu soo qaaday kulamo dhex maray Madaxweynaha Somaliland iyo Wasiirka Difaaca Israa’iil, Israel Katz, iyadoo la tixgelinayo muhiimadda juqraafiyeed ee Somaliland oo ku taalla meel u dhow marin-biyoodka istaraatiijiga ah ee Bab al-Mandab.

Muhiimadda Juqraafiyeed ee Somaliland

Khubarada amniga ayaa aaminsan in goobta ay Somaliland ku taallo ay muhiim u tahay amniga Badda Cas iyo Gacanka Cadmeed, maadaama ay ka mid tahay meelaha ugu muhiimsan ee ay maraan maraakiibta ganacsiga caalamiga ahi.

Soomaaliya oo Ka Soo Horjeedsatay

Dhanka kale, Dowladda Federaalka Soomaaliya ayaa ka soo horjeedsatay tallaabooyinka la xidhiidha aqoonsiga Somaliland, iyadoo ku tilmaantay arrimahaas kuwo lid ku ah madax-bannaanida iyo wadajirka dhuleed ee Soomaaliya.

Somaliland iyo Aqoonsi Raadinta

Somaliland ayaa si iskeed ah ugu dhawaaqday inay ka go'day Soomaaliya sannadkii 1991-kii, tan iyo markaasna waxay wadday dedaallo ay ku raadinayso aqoonsi caalami ah iyo xoojinta xidhiidhada diblomaasiyadeed ee ay la yeelanayso dalalka caalamka.