Wasiirka Arrimaha Dibadda iyo Iskaashiga Caalamiga ah ee Jamhuuriyadda Somaliland, Mudane Cabdiraxmaan Daahir Aadan (Bakaal), ayaa sheegay in xidhiidhka u dhexeeya Somaliland iyo Israa’iil uu yahay mid furan, isla markaana labada dhinac ay ka wada shaqayn karaan dhammaan arrimaha ay u arkaan inay dan ugu jirto labada dal.

Wasiirka oo waraysi siiyey warbaahinta Israa’iil, isla markaana ay soo xigatay Wakaaladda Wararka Somaliland (SOLNA), ayaa xusay in iskaashiga Somaliland iyo Israa’iil aanu ku koobnayn dhinacyada dhaqaalaha oo keliya, balse uu gaadhi karo amniga, tiknoolajiyadda iyo qaybaha kale ee muhiimka ah.

Iskaashi Ballaadhan oo Labada Dhinac Ka Dhexeeya

Wasiir Bakaal ayaa sheegay in Somaliland iyo Israa’iil ay xor u yihiin inay ka wada hadlaan arrin kasta oo faa’iido u leh labada dhinac, isaga oo tilmaamay inaanu jirin xadidaya nooca iskaashiga ay mustaqbalka yeelan karaan.

Waxa uu xusay in xidhiidhka labada dhinac uu ku salaysan yahay dano wadaag, is-ixtiraam iyo iskaashi wax-ku-ool ah.

Rajo Laga Qabo Aqoonsiyo Cusub

Wasiirka Arrimaha Dibadda Somaliland ayaa muujiyey kalsooni uu ku qabo in dalal kale ay dhowaan ku dayan doonaan Israa’iil, isla markaana ay aqoonsan doonaan madaxbannaanida Jamhuuriyadda Somaliland.

Waxa uu sheegay in tallaabada Israa’iil ee aqoonsiga Somaliland, furitaanka safaarad iyo martiqaadka Madaxweynaha Somaliland ay albaab cusub u furtay waddamo kale oo doonaya inay qaadaan tallaabooyin la mid ah.

Jawaab Ku Socota Soomaaliya

Dhanka kale, Wasiirka ayaa jawaab ka bixiyey hadallo ka soo yeedhay Dowladda Federaalka Soomaaliya ee la xidhiidha aqoonsiga Somaliland.

Waxa uu ugu baaqay Soomaaliya inay xoogga saarto xalinta caqabadaha amni, siyaasadeed iyo bulsho ee ka jira gudaha dalkeeda, halkii ay ka dhaliili lahayd xidhiidhada iyo go’aamada diblomaasiyadeed ee Somaliland.

Mahadnaq loo Diray Israa’iil

Ugu dambayn, Wasiirka Arrimaha Dibadda Somaliland ayaa uga mahadceliyey Dowladda iyo shacabka Israa’iil sida ay ula dhaqmeen Somaliland iyo taageerada ay muujiyeen.

Waxa uu sheegay in Somaliland ay si weyn u qiimaynayso xidhiidhka labada dhinac, isla markaana ay rajaynayso in iskaashiga iyo wada-shaqayntu sii xoogaystaan mustaqbalka.