Marwada Koowaad ee Jamhuuriyadda Somaliland, Marwo Farduus Maxamed Rooble, ayaa door muhiim ah ka qaadatay safarkii taariikhiga ahaa ee Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), uu ku tegay dalka Israa’iil.

Marwada Koowaad ayaa si sharaf iyo waajibaad qaran leh u garab taagnayd Madaxweynaha intii uu socday safarka rasmiga ah, iyadoo ka qayb qaadatay munaasibado, kulamo iyo booqashooyin muhiim ah oo qayb ka ahaa ajandaha weftiga Somaliland.

Astaan Qaran iyo Diblomaasiyadeed

Ka qaybgalka Marwada Koowaad ee safarka ayaa ka tarjumaya kaalinta muhiimka ah ee ay ku leedahay matalaadda qaranka iyo xoojinta sumcadda Somaliland ee fagaarayaasha caalamiga ah.

Marwo Farduus Maxamed Rooble ayaa muujisay hufnaan, sharaf iyo masuuliyad qaran, taas oo sare u qaaday muuqaalka iyo haybadda Somaliland intii lagu guda jiray booqashada.

Garab Taagnaanta Hoggaanka Qaranka

Marwada Koowaad ayaa si dhow ula socotay hawlaha iyo kulamada Madaxweynaha, iyadoo muujisay taageero joogto ah oo ku aaddan dedaallada lagu xoojinayo xidhiidhka diblomaasiyadeed, iskaashiga iyo horumarka Somaliland.

Safarkan taariikhiga ah ayaa noqday mid lagu xasuusan doono dedaallada ay wadajir u muujiyeen Madaxweynaha iyo Marwada Koowaad ee Jamhuuriyadda Somaliland, kuwaas oo si qaranimo iyo sharaf leh u matalay shacabka Somaliland.