Dawladda Israa’iil ayaa la sheegay inay codsi u dirtay shirkadda X (Twitter), kaas oo lagu dalbanayo in madasha lagu daro calanka Jamhuuriyadda Somaliland.

Sida lagu sheegay wararka la xidhiidha arrintan, codsiga ayaa ka dambeeyey xidhiidhka sii kobcaya ee u dhexeeya Somaliland iyo Israa’iil, iyo aqoonsiga ay Israa’iil siisay Somaliland.

Haddii codsigan la aqbalo, waxa ay taasi u sahli kartaa isticmaalayaasha madasha X inay si rasmi ah u adeegsadaan astaanta calanka Somaliland sida dalalka kale ee dunida.

Ilaa hadda, shirkadda X si rasmi ah ugamay jawaabin codsigan, mana jirto go’aan rasmi ah oo laga soo saaray arrintan.

Arrintan ayaa dhalisay hadal-hayn iyo falcelin kala duwan, iyadoo dad badani u arkaan tallaabo astaan u noqon karta korodhka muuqaalka Somaliland ee fagaarayaasha caalamiga ah.