Raysal Wasaaraha Israa’iil, Benjamin Netanyahu, ayaa shir jaraa’id oo uu qabtay ku sheegay in ka hortagga in Iran hesho hub nukliyeer ah uu yahay himilada ugu weyn ee siyaasaddiisa, isla markaana uu sii wadi doono dadaalladaas inta uu xilka hayo.

"Waxaan sannado badan la dagaallamay dadaallada Iran ee ay ku doonayso inay ku yeelato hub nukliyeer ah. Waxa aan ku tilmaami karaa hawsha ugu weyn ee noloshayda. Heshiis ha jiro ama yaanu jirin, Iran ma heli doonto hub nukliyeer ah. Maanta ma heli doonto, berrina ma heli doonto. Inta aan ahay Raysal Wasaaraha Israa’iil, taasi ma dhici doonto,” ayuu yidhi Netanyahu.

Raysal Wasaaruhu waxa uu sheegay in Israa’iil iyo Maraykanku ay si wadajir ah u fuliyeen hawlgallo milatari oo waaweyn, kuwaas oo uu sheegay inay waxyeello weyn gaadhsiiyeen awooddii milatari iyo nukliyeer ee Iran.

Netanyahu ayaa sheegay in tallaabooyinkaasi ay ka hortageen khatar uu ku tilmaamay mid halis ku ahayd jiritaanka Israa’iil, isaga oo xusay in Iran ku dhowayd inay gaadho awood ay ku samaysato hub nukliyeer ah.

Waxa kale oo uu sheegay in dagaalladii ay Israa’iil la gashay kooxaha ay Iran taageerto ay keeneen guulo waaweyn oo dhinaca amniga ah, isaga oo xusay hawlgallada laga fuliyey Gaza, Lubnaan, Suuriya iyo Yemen.

Raysal Wasaaruhu waxa uu sheegay in Israa’iil dib u qaabaysay istaraatiijiyaddeeda amniga, isla markaana ay qaadatay siyaasad ku salaysan weerar hore iyo ka hortag khataraha ka hor inta aanay dhicin.

"Waxaan jebinnay caqabaddii cabsida. Waxaan qaadannaa tallaabada koowaad, waan weerarnaa, waan ka yaabinnaa cadawgeenna, waxaana beegsannaa kuwa khatarta ku ah nolosheenna,” ayuu yidhi.

Netanyahu waxa uu sidoo kale sheegay in Israa’iil maanta ka xoog badan tahay sidii hore, halka awooddii kooxaha ay Iran taageerto ay si weyn u daciiftay.

Ugu dambayn, Raysal Wasaaraha Israa’iil ayaa uga mahadceliyey shacabka iyo ciidamada ammaanka taageerada ay siiyeen xukuumaddiisa, isaga oo sheegay in Israa’iil sii wadi doonto difaaca amnigeeda, xoojinta awooddeeda iyo dhismaha iskaashiyo cusub oo caalami ah.

"Wadajir ayaan u sii adkaysan doonaa, wadajir ayaana u sii guulaysan doonaa,” ayuu hadalkiisa ku soo gabagabeeyey.