Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), iyo weftigii uu hoggaaminayey ayaa xalay kulan casho iyo is-barasho ah la yeeshay madaxda shirkadaha ugu waaweyn dalka Israa’iil, maal-gashadayaal caalami ah iyo hoggaamiyeyaasha ururrada ganacsiga ee dalkaas.

Kulanka ayaa qayb ka ahaa dadaallada lagu xoojinayo xidhiidhka dhaqaale iyo iskaashiga ganacsi ee u dhexeeya Jamhuuriyadda Somaliland iyo Israa’iil, iyadoo diiradda la saaray fursadaha maalgashi ee ka jira Somaliland.

Fursadaha Maalgashi ee Somaliland

Madaxweynaha iyo xubno ka mid ah weftigiisa ayaa martida si faahfaahsan uga warbixiyey fursadaha dhaqaale iyo maalgashi ee ka jira Somaliland, gaar ahaan qaybaha xoolaha, beeraha, kalluumaysiga, macdanta, tamarta, shidaalka, dhaqaalaha buluugga ah iyo horumarinta kaabeyaasha dhaqaalaha.

Waxay sidoo kale sharaxeen qorshayaasha xukuumaddu ku horumarinayso jawiga maalgashiga iyo sidii loo soo jiidan lahaa maalgelinta caalamiga ah.

Amniga iyo Goobta Istiraatiijiga ah ee Somaliland

Madaxweyne Cabdiraxmaan Cirro ayaa si gaar ah u iftiimiyey amniga iyo xasilloonida ay Somaliland ku naaloonayso, isaga oo tilmaamay in nabadgelyada iyo nidaamka dawladnimo ee dalka ka jira ay yihiin qodobbada ugu muhiimsan ee dhiirrigeliya maalgashiga.

Waxa kale oo uu ka hadlay goobta istiraatiijiga ah ee Somaliland ku taallo, khayraadka dabiiciga ah ee dalka ku duugan iyo siyaasadaha ay xukuumaddu dejisay si loo dhiirrigeliyo maalgashiga shisheeye.

Xoojinta Iskaashiga Dhaqaalaha

Kulanka ayaa si weyn diiradda loogu saaray sidii loo abuuri lahaa iskaashi dhaqaale, ganacsi iyo maalgashi oo waara, isla markaana loo dhisi lahaa xidhiidh miro-dhal ah oo u dhexeeya ganacsatada iyo maal-gashadayaasha labada dhinac.

Madaxweyne Cirro ayaa ganacsatada iyo maal-gashadayaasha Israa’iil ku boorriyey inay ka faa’iidaystaan fursadaha ballaadhan ee ka jira Somaliland, isaga oo xaqiijiyey in Somaliland diyaar u tahay iskaashi ku salaysan kalsooni, dano-wadaag iyo horumar wadajir ah.

Dadaallada Soo Jiidashada Maalgashiga

Kulankan ayaa ka mid ah dadaallada ay Jamhuuriyadda Somaliland ku doonayso inay ku xoojiso xidhiidhka dhaqaale ee ay la leedahay waddamada iyo hay’adaha caalamiga ah, isla markaana ay ku soo jiidato maalgelin gacan ka geysata koboca dhaqaalaha, shaqo-abuurka iyo horumarinta kaabeyaasha dalka.