Jamhuuriyadda Dimuqraadiga ah ee Congo (DRC) ayaa ku dhawaaqday in tirada kiisaska la xaqiijiyey ee cudurka Ebola ay gaadheen 676 kiis, halka 136 qof ay u dhinteen cudurka, sida lagu sheegay xog rasmi ah oo ay dowladda Congo soo saartay, taas oo ay soo xigatay warbaahinta Al Jazeera.

Masuuliyiinta caafimaadka dalka Congo ayaa sheegay in dadaallo xooggan lagu xakameynayo faafitaanka cudurka ay weli socdaan, iyadoo la xoojinayo dabagalka dadka cudurka laga helay, daaweynta bukaannada iyo wacyigelinta bulshada.

Walaac Caafimaad oo Sii Kordhaya

Korodhka tirada kiisaska iyo dhimashada ayaa sare u qaaday walaaca laga qabo fiditaanka cudurka, gaar ahaan deegaannada uu sida weyn u saameeyey.

Hay’adaha caafimaadka ee gudaha iyo kuwa caalamiga ah ayaa sii wada hawlgallada lagu xakamaynayo cudurka iyo yaraynta saamayntiisa.

Ebola oo Ka Mid Ah Cudurrada Ugu Halista Badan

Ebola waa cudur fayras ah oo aad u halis badan, kaas oo ku faafa taabashada dheecaannada jirka ee qof cudurka qaba ama agabka uu isticmaalay. Calaamadaha ugu badan waxaa ka mid ah qandho daran, madax-xanuun, matag, shuban iyo dhiig-bax gudaha ama dibadda ah.

Dadaallada Xakamaynta

Dowladda Congo iyo hay’adaha caafimaadka ee caalamiga ah ayaa ku baaqay in la xoojiyo tallaabooyinka ka hortagga, si loo xakameeyo fiditaanka cudurka loogana hortago inuu ku faafo deegaanno kale.

Warbixinnadii ugu dambeeyey ayaa muujinaya in hawlaha caafimaadka degdegga ah iyo ololayaasha wacyigelinta bulshada ay weli si xooggan uga socdaan goobaha uu cudurku saameeyey.