Guddoomiyaha Xisbiga Muxaafidka ah ee WADDANI, Mudane Xirsi Cali Xaaji Xasan, ayaa marti ku ahaa barnaamij ku saabsan Dhalinyarada iyo Siyaasadda oo ay soo qabanqaabisay madasha Raad Research & Development, halkaas oo uu kula yeeshay dood furan iyo is-weydaarsi fikradeed dhalinyaro ka kala socotay qaybaha kala duwan ee bulshada.

Kulanka ayaa diiradda lagu saaray arrimo la xidhiidha xaaladda siyaasadeed ee dalka, himilada iyo aragtida Xisbiga WADDANI, iyo sidoo kale waxqabadka ay ku tallaabsatay Xukuumadda Wadajir iyo Waxqabad muddadii koobnayd ee ay xilka haysay.

Su’aalo Ku Saabsan Siyaasadda Dalka

Dhalinyaradii ka qayb-gashay madasha ayaa Guddoomiyaha weydiiyey su’aalo kala duwan oo ku saabsan xaaladda siyaasadeed ee Somaliland, mustaqbalka dimuqraadiyadda, doorka xisbiyada siyaasadda iyo arrimaha horumarinta qaranka.

Guddoomiye Xirsi Cali Xaaji Xasan ayaa ka jawaabay su’aalahaasi, isaga oo faahfaahin ka bixiyey aragtida xisbiga WADDANI iyo qorshayaasha uu xisbigu u leeyahay horumarinta dalka iyo ka qaybgalka dhalinyarada ee siyaasadda.

Dhalinyarada iyo Fursadaha Guusha

Guddoomiyaha ayaa sidoo kale madasha ka jeediyey hadal ku saabsan fursadaha ay dhalinyaradu ku gaadhi karaan guulaha siyaasadda, aqoonta iyo dhaqaalaha.

Waxa uu ku boorriyey dhalinyarada inay xoogga saaraan waxbarashada, kobcinta xirfadaha iyo ka qaybgalka arrimaha bulshada, isaga oo xusay in dhalinyaradu yihiin awoodda ugu weyn ee horseedi karta horumarka dalka.

Waayo-aragnimada Siyaasadeed

Intii uu kulanku socday, Guddoomiye Xirsi ayaa la wadaagay dhalinyarada qaar ka mid ah waayo-aragnimadiisii siyaasadeed iyo casharradii uu ka bartay muddadii uu ku jiray shaqada dawladda iyo siyaasadda.

Waxa uu ku dhiirrigeliyey dhalinyarada inay yeeshaan himilooyin waaweyn, dulqaad iyo dedaal joogto ah si ay uga mid noqdaan hoggaamiyeyaasha mustaqbalka ee dalka.

Madal Lagu Dhiirrigeliyey Wada-hadalka Dhalinyarada

Barnaamijkan ay soo qabanqaabisay madasha Raad Research & Development ayaa noqday fursad muhiim ah oo dhalinyaradu si toos ah ugu weydiinayeen masuuliyiinta siyaasadda su’aalo ku saabsan arrimaha qaranka, isla markaana ay ku helayeen aqoon iyo aragtiyo ku saabsan hoggaaminta iyo siyaasadda.