Komishanka Doorashooyinka Qaranka Jamhuuriyadda Somaliland (KDQ) iyo Xisbiga Mucaaradka ah ee KAAH ayaa gaadhay is-afgarad buuxa, kadib wadahadallo iyo kulammo muddo socday oo lagu xallinayey khilaafkii u dhexeeyey labada dhinac.

Is-afgaradkan ayaa lagu soo afjaray murankii jiray, iyadoo labada dhinac ay ku heshiiyeen in dib loo soo celiyo wada-shaqayntii rasmiga ahayd, si loo xoojiyo iskaashiga, isfahamka iyo hufnaanta hawlaha la xidhiidha geeddi-socodka doorashooyinka dalka.

KDQ iyo Xisbiga KAAH ayaa muujiyey sida ay uga go’an tahay ilaalinta nidaamka dimuqraadiyadda iyo wada-shaqayn wax-ku-ool ah oo horseedda doorashooyin xor iyo xalaal ah.

Heshiiskan ayaa loo arkaa tallaabo muhiim ah oo lagu xoojinayo kalsoonida dhinacyada siyaasadda, laguna xasilinayo geeddi-socodka dimuqraadiyadda iyo horumarka doorashooyinka Somaliland.