Wasiirka Wasaaradda Gaadiidka iyo Horumarinta Jidadka Somaliland, Wasiiru-dawlaha Wasaaradda Maaliyadda iyo Horumarinta Dhaqaalaha, iyo masuuliyiin kale oo ka tirsan labada wasaaradood ayaa si wadajir ah u shaaciyey olole qaran oo ka bilaabmi doona guud ahaan dalka 6-da June 2026.

Ololahan ayaa ujeeddadiisu tahay xoojinta nidaaminta gaadiidka, ururinta cashuuraha iyo horumarinta adeegyada la xidhiidha gaadiidka, iyadoo mudnaan gaar ah la siinayo casriyeynta iyo sharciyeynta xogta gaadiidka dalka.

Beddelka Taarikooyinka iyo Cusboonaysiinta Liisannada

Masuuliyiintu waxay sheegeen in ololaha lagu dardargelin doono beddelka taarikooyinkii hore ee gaadiidka, cusboonaysiinta liisannada wadista, cashuuraha kala-wareejinta gaadiidka iyo adeegyada wado-marista.

Waxay sidoo kale caddeeyeen in si adag loo dhaqan-gelin doono joojinta isticmaalka taarikooyinkii hore iyo liisannada dhacay, si loo xaqiijiyo nidaam gaadiid oo casri ah oo waafaqsan shuruucda dalka.

Guulo Laga Gaadhay Wajigii Koowaad

Masuuliyiintu waxay shaaca ka qaadeen in wajigii koowaad ee mashruuca beddelka taarikooyinka lagu guulaystay in la beddelo 4,275 taariko.

Waxay xuseen in wajiga labaad ee mashruuca, oo si rasmi ah u bilaabmaya 6-da June, lagu dhamaystiri doono taarikooyinka hadhay, isla markaana lagu xoojin doono hubinta sharciyadda gaadiidka iyo darawallada.

Baaq Ku Socda Mulkiilayaasha Gaadiidka

Xukuumaddu waxay ugu baaqday shacabka iyo mulkiilayaasha gaadiidka inay si buuxda ula shaqeeyaan ololahan qaran, si loo xaqiijiyo nidaam gaadiid oo hufan, sharciyeysan oo casri ah.

Masuuliyiintu waxay tilmaameen in hirgelinta ololahan ay ka qayb qaadan doonto kor u qaadista dakhliga dowladda, hagaajinta adeegyada gaadiidka iyo xoojinta amniga iyo kala dambaynta waddooyinka dalka.

Horumarinta Adeegyada Gaadiidka

Ololahan cusub ayaa qayb ka ah dadaallada ay xukuumaddu ku doonayso inay ku horumariso adeegyada gaadiidka, korna ugu qaaddo tayada maamulka iyo nidaaminta gaadiidka Somaliland.

Masuuliyiintu waxay sheegeen in mashruucani door weyn ka qaadan doono dhismaha nidaam gaadiid oo casri ah, isla markaana waafaqsan baahiyaha horumarineed ee dalka.