Wasiir-ku-xigeenka Wasaaradda Horumarinta Caafimaadka Jamhuuriyadda Somaliland ayaa shir heer sare ah guddoomiyey, kaas oo diiradda lagu saaray xoojinta diyaargarowga qaranka ee ka hortagga cudurka Ebola iyo khataraha kale ee caafimaad ee ka jira Geeska Afrika.

Kulanka ayaa waxaa ka qayb galay masuuliyiin sare oo ka tirsan dowladda iyo khubaro caafimaad, kuwaas oo ka wada hadlay khataraha caafimaad ee gobolka iyo tallaabooyinka lagama maarmaanka u ah ka hortagga cudurrada faafa.

Masuuliyiintu waxay si gaar ah u falanqeeyeen dillaacyada cudurka Ebola ee laga soo sheegay dalalka Uganda iyo Jamhuuriyadda Dimuqraadiga ah ee Congo (DRC), iyaga oo qiimeeyey heerka diyaargarowga Somaliland iyo qorshayaasha looga hortagayo faafitaanka cudurka.

Kulanka ayaa lagu go’aamiyey in la dhiso Guddi Heer Qaran ah oo Isku-dhafan (High-Level Multi-Sectoral Task Force), kaas oo isku dubbaridi doona dadaallada ka hortagga cudurka iyo hawlaha degdegga ah ee la xidhiidha xaaladaha caafimaad.

Sidoo kale, Wasaaradda Horumarinta Caafimaadka ayaa shaacisay dhismaha Guddi Farsamo (Technical Task Force) oo masuul ka noqon doona qorshaynta, diyaarinta, kormeerka iyo hirgelinta tallaabooyinka caafimaad ee degdegga ah ee dalka oo dhan.

Masuuliyiinta ayaa adkeeyey muhiimadda wada-shaqaynta hay’adaha dowladda, bah-wadaagta caafimaadka iyo hay’adaha caalamiga ah si loo xaqiijiyo jawaab degdeg ah oo wax-ku-ool ah haddii ay soo baxaan khataro caafimaad.

Kulankan ayaa muujinaya sida ay Somaliland uga go’an tahay xoojinta nidaamka caafimaadka dalka iyo kor u qaadista heerka diyaar-garowga ee lagaga hortagayo cudurrada faafa iyo xaaladaha degdegga ah ee caafimaad.